Tags-Chehra

sūrat-e-ātish-e-ḳhāmosh jalā kartā huuñ
dekhtā huuñ shab-e-ġham aap tamāshā apnā

sūrat-e-hāl ambar ajab chiiz hai
us ne dariyā kahā maiñ kināra huā

sūrat-e-zanjīr mauj-e-ḳhūñ meñ ik āhañg hai
āgahī kī had pe ik ḳhvāb-e-junūñ kī jañg hai

safar bhī tum ne kiyā āftāb kī sūrat
abhī tak apne hī naqsh-e-qadam pe chalte ho

rañgoñ se na rakhiye kisī sūrat kī tavaqqo
vo ḳhuun kā qatra hai jo shahkār banegā

ban gayā huuñ maiñ sūrat-e-dīvār
sāmne aa gayā hai jab koī

apnī sūrat ko badalnā hī nahīñ chāhtā maiñ
ab kisī sāñche meñ Dhalnā hī nahīñ chāhtā maiñ

ghar meñ koī ārām kī sūrat nahīñ phir bhī
thak-hār ke ghar jaate haiñ ma.alūm nahīñ kyuuñ

ho rahī haiñ har galī-kūche meñ ātish-bāziyāñ
aar rahā hai abr kī sūrat tamavvul kā dhuāñ

ye vasf bhī kamāl-e-junūñ āshnā.ī de
har ā.īne meñ ik vahī sūrat dikhā.ī de

jām-e-mai daur meñ lā charḳh-e-kuhan kī sūrat
dekhtā hai jo tujhe rañg nayā ai vaa.iz

muddat ke ba.ad apnī taraf phir gayā ḳhayāl
tum kyā mile ki sūrat-e-hastī nazar paḌī

ye vahm sā hotā hai mujhe dekh ke un ko
sīrat kā ḳhudā aur hai sūrat kā ḳhudā aur

dard zanjīr kī sūrat hai diloñ meñ maujūd
is se pahle to kabhī is ke ye pairā.e na the

talāsh-e-jalva-e-mānī meñ Takrāyā kiye sajde
na TuuTā dast-e-ḳhushk-e-zohd se but-ḳhāna sūrat kā

nigah be-his ḳhat-e-sāġhar kī sūrat hai ki saaqī ne
diyā hai mardum-e-chashm-e-jahāñ ko jaam hairat kā

sūrat vo bhalī ki ho magar māh-e-tamām
sīrat vo burī ki ho magar vālī-e-shām

be-vaj.h sañgsār jo mujh ko kiyā gayā
vo thī ik intiqām kī sūrat sazā na thī

ab aur us ke sivā na hogī qafas meñ taskīn-e-dil kī sūrat
chaman kī jānib nazar uThā kar kabhī kabhī hans liyā kareñge

ho ga.iiñ sūrat-e-dīvār havā.eñ haa.el
jab kisī ashk ne dāman pe utarnā chāhā