Tags-Chehra

jab us ne mujh se ye kahā thā ishq rifāqat hī to nahīñ
tab maiñ ne har shaḳhs kī sūrat mushkil se pahchānī thī

ḳhud bhī miT jā.ūñ ye duniyā bhī miTātā jā.ūñ
bas yahī sūrat-e-ta.amīr nazar aa.ī hai

terī sūrat tirī ma.asūm o muqaddas sūrat
merī har soch ke ā.īne meñ lahrātī hai

phir tirī titlī-numā sūrat mujhe yaad aa ga.ī
mujh ko vo lamha abhī bhūlā nahīñ

aa ke sūrat dikhā in āñkhoñ ko
bujh na jaa.e kahīñ diyā dil kā

ham ko aane se tumhārī bazm ke kyā thā husūl
dekh lete the magar sūrat tumhārī aan kar

hamārī aañkh kī putlī meñ ashk kī sūrat
chamak rahā hai kisī shahr-e-be-misāl kā dukh

ġhubār-e-tañg-zehnī sūrat-e-ḳhanjar nikaltā hai
hamārī bastiyoñ se roz ik lashkar nikaltā hai

'valī' kī zindagī ā.īna-sūrat
sadāqat hī sadāqat boltī hai

imārat ho ki ġhurbat boltī hai
ba-har-sūrat sharāfat boltī hai

sarmāya-e-hayāt hai hirmān-e-āshiqī
hai saath ek sūrat-e-zebā liye hue

bilā maqsad nahīñ ye dekhnā bhī
kisī ko ḳhūbsūrat kar rahā huuñ

banāvaT barmalā phūloñ kī sūrat
ki ḳhushbū ko chhupā rakkhā hai us ne

be-māya habābo mujhe dekho ki adam se
maiñ sū-e-abad sail kī sūrat meñ bahā huuñ