Tags-Chehra

bholī sūrat kī hai ḳhūbī varna
ho adū dost-numā kyā baa.is

ye kaisī sūrat-e-mahtāb khul rahī hai magar
zamīñ pe kis ne ise arsh se utārā hai

maiñ jā rahā huuñ mukammal vajūd paane ko
mujhe bhī sūrat-e-imkāñ ne ab pukārā hai

tū shāḳh shāḳh pe baiThā hai phuul kī sūrat
maiñ ḳhaar ḳhaar se uljhūñ to tujh se baat karūñ

bār-hā ye bhī huā anjuman-e-nāz se ham
sūrat-e-mauj uThe misl-e-talātum aa.e

maiñ ḳhush huuñ bahut gard ko ā.īne pe rakh kar
dī vo mujhe sūrat jo dikhāne kī nahīñ thī

kabhī jo parda-e-be-sūratī meñ jalva-farmā the
unhīñ ko ālam-e-sūrat meñ dekhā be-hijābāna

bas ek rasta hai guftugū kā bas ek sūrat hai rābte kī
ḳhatoñ meñ un se savāl karnā ḳhatoñ meñ un ke javāb paḌhnā

qaid se pahle bhī āzādī mirī ḳhatre meñ thī
āshiyāna hī mirā sūrat-numā-e-dām thā

ye hai turfa sūrat-e-dostī ki nigāh-e-dil hama barf haiñ
na vo baada hai na vo zarf haiñ na vo harf haiñ na hikāyateñ

raat kaaTe nahīñ kaTtī hai kisī sūrat se
din to duniyā ke bakheḌoñ meñ guzar jaatā hai

jab ilm ho sūrat-gar-e-mashshāta-e-dozaḳh
firdaus hai aadam ke liye be-ḳhabarī bhī

chāñdnī-rāt meñ sandal sā bikhartā saaya
ek aaseb kī sūrat nazar aayā saaya

naqāb laakh chhupā.e vo chhup nahīñ saktī
mirī nazar meñ jo sūrat hai dilrubā terī

sehr-e-goyā.ī ke kis dasht kā faizān hai ye
har suḳhan lab se tire sūrat-e-āhū niklā

ḳhushnumā aks hue ḳhaar kī sūrat kaise
aa.ine sab the to phir sañg kahāñ se aayā

vo mirī sūrat to dekheñ apnī sūrat ke liye
kaash ā.īna banā de merī hairānī mujhe

apnī bātoñ ke zamāne to havā-burd hue
ab kiyā karte haiñ ham sūrat-e-hālāt pe baat

bichhaḌte jaate haiñ ahbāb ḳhvāb kī sūrat
guzartā jaatā hai yādoñ kā kārvāñ aage

ye aañsū chaar din ke haiñ ye aañsū suukh jā.eñge
sikhā deñge tumheñ hālāt har sūrat meñ ḳhush rahnā