Tags-Chehra

ġham ko ḳhushī kī sūrat baḳhshī
is kā bhī sehrā aap ke sar hai

jo ḳhvāb kī dahlīz talak bhī nahīñ aayā
aaj us se mulāqāt kī sūrat nikal aa.ī

jis ke kuchh taar ulajh jaate haiñ dil kī sūrat
bas usī saaz pe gaane meñ maza aatā hai

terā har jalva hai ā.īna-e-asrār-e-azal
terī sūrat meñ haiñ anvār-e-ma.ānī sanamā

isī meñ amaañ hai ki maiñ un ke chehre palaT kar na dekhūñ
palaTne kī sūrat meñ ye kīna-parvar mujhe maar deñge

mehr-o-māh kī sūrat muskurā ke guzre haiñ
ḳhāk-dān-e-tīra se ham bhī roz-o-shab tanhā

koī sūrat nahīñ hai juḌne kī
itne TukḌoñ meñ baT ke aayā huuñ

yahāñ bāl-o-parī bhī ek sūrat hai asīrī kī
asīr-e-bāl-o-par ho kar ġhurūr-e-bāl-o-par karnā

itnā paspā na ho dīvār se lag jā.egā
itne samjhaute na kar sūrat-e-hālāt ke saath

chhoTe chhoTe ka.ī be-faiz mafādāt ke saath
log zinda haiñ ajab sūrat-e-hālāt ke saath

ba-faiz-e-gardish-e-ayyām ham ko
kisī sūrat nahīñ ārām ham ko

dīvānoñ kā bhes banā leñ yā sūrat shahzādoñ kī
duur se pahchānī jaatī hai shakl tire barbādoñ kī

maiñ apnī dāstāñ ko āḳhir-e-shab tak to le aayā
tum is kā ḳhūbsūrat sā koī anjām likh denā

kis tarah kho.e ga.e aks-e-ravāñ kī sūrat
shahr-e-hairāñ meñ tirā khoj lagāne vaale

us kī sūrat se huuñ sannā-e-azal kā qaa.il
jalva-e-qudrat-e-haq husn-e-bashar hai ki nahīñ

but-kade meñ to tujhe dekh liyā kartā thā
ḳhaas ka.abe meñ to sūrat bhī dikhā.ī na ga.ī

zindagī film nahīñ jis kā ho anjām hasīñ
sūrat-e-hāl ye gambhīr bhī ho saktī hai

dām-bardār koī dasht-e-vafā se guzrā
sūrat-e-ḳhvāb huā husn-e-ḳhirām-e-āhū

tum nahīñ aa.e the jab tab bhī to maujūd the tum
aañkh meñ nuur kī aur dil meñ lahū kī sūrat

jaise ye mirī apnī sūrat mire sāmne ho aur kahtī ho
mire shā.er tere saath huuñ maiñ māyūs na ho dil-gīr na ho