Tags-Crime

mujhe dil kī ḳhatā par 'yās' sharmānā nahīñ aatā
parāyā jurm apne naam likhvānā nahīñ aatā

aur iqbāl-e-jurm kyā ho 'shakīl'
thartharāte laboñ pe aah to hai

ishq ke jurm meñ karvā ke giraftār mujhe
koī pāzeb kī jhankār sunā.e haa.e

zindagī jurm to nahīñ lekin
ho ke sarzad banā rahā huuñ maiñ

imtihāñ is dil-e-pur-shauq kā karte rahiye
aur is jurm-e-vafā par koī tāzīr sahī

merī āñkhoñ meñ anokhe jurm kī tajvīz thī
sirf dekhā thā use us kā badan mailā huā

ye log vo haiñ jo be-jurm sañgsār hue
harīf rah ke tire manchaloñ meñ kyā kartā

'yāvar' ham ko pā na sakoge jaise ab haiñ aise kab the
dil kī nazākat jurm-e-mohabbat kufr-e-tamannā kyā nahīñ dekhā

vaqt kī nazākat kā aaj jo taqāzā hai jurm kal na kahlā.e
toḌ do ḳhamoshī ke āhanī hisāroñ ko khol do zabāñ logo

apnī vaj.h-e-barbādī jānte haiñ ham lekin kyā kareñ bayāñ logo
maslahat-parastī par har qadam rahā ham ko jurm kā gumāñ logo

faqat ik jurm-e-haq-goī ke chalte terī mahfil meñ
tire 'āsif' kī mastī mojib-e-tāzīr hai saaqī

maiñ bhī sach kahtā huuñ is jurm meñ duniyā vaalo
mere hāthoñ meñ bhī ik zahr kā piyāla de do

zindagī ab rahe ḳhatā kab tak
jurm kī bārhā sazā kab tak

kar ga.ī dīvāngī ham ko barī har jurm se
chāk-dāmānī se apnī pāk-dāmānī huī

zindān-e-ehtiyāt meñ guzrī tamām umr
maiñ jurm-e-āgahī kī sazā kāTtā rahā

koī subūt-e-jurm jagah par nahīñ milā
TuuTe paḌe the aa.ine patthar nahīñ milā

kabhī fāsloñ kī masāfatoñ pe ubuur ho to ye kah sukūñ
mirā jurm hasrat-e-qurb hai to yahī kamī yahāñ sab meñ hai

zabān-o-jism-o-jān-o-dil gavāh sab jo ban ga.e
to jurm un se ho ke darkinār kar liyā gayā

huzūr jurm-o-sazā to bas ik bahānā hai
hamī the ahal salībeñ na.ī sajāne ke

'sābir' zamīñ pe rañj bhī us ne utāre haiñ
lekin ye fard-e-jurm mire naam aa ga.ī