Tags-Dariya

ashk ke dariyā ne rakh lī aabrū ai chashm-e-tar
marte dam do gaz zamīn kyā bahr-e-turbat māñgtā

marā jaatā hai jis ġhairat meñ dariyā
girā kis kā hai dil chāh-e-zaqan meñ

udaas āñkhoñ se tak rahā thā mujhe vo chhūTā huā kinārā
shikasta kashtī se jab maiñ dariyā ke paar utrā to maiñ ne dekhā

kabhī to Duub chale ham kabhī ubharte hue
ḳhud apnī zaat ke dariyā ko paar karte hue

tumhārā naqsh in āñkhoñ se dhultā bhī to kaise
ki dariyā meñ vo pahlī sī ravānī bhī kahāñ thī

maiñ ki ḳhush hotā thā dariyā kī ravānī dekh kar
kaañp uTThā huuñ galī-kūchoñ meñ paanī dekh kar

koī Duub gayā to kyā Duubā koī paar utrā to kyā utrā
par kyā kahiye dil dariyā kī jo paañv dhare itrāne lage

kaash aisā ho tere shahr meñ pyāsā aa.uuñ
aur tire qadmoñ se ho kar koī dariyā nikle

nahīf tinkā bhalā tez dhaar kyā jaane
na kar sakegā vo dariyā ko paar kyā jaane

kyā baat karūñ kabhī paanī bāteñ kartā thā
ye dariyā is kī ḳhushk zamīñ kyā baat karūñ

dariyā ke shor-o-shar se meñ ḳhā.if na thā magar
sāhil ke intishār se Darnā paḌā mujhe

maiñ ne pahlā hī qadam rakkhā hai dariyā meñ abhī
ḳhair-maqdam ke liye kitne bhañvar aane lage

merā juzv bhī jaise kul meñ shāmil ho
dariyā meñ ek qatra rakh kar sochūñgā

ho gayā ġharqāb dariyā phañs ke maiñ girdāb meñ
fāsle se dekhtā hī rah gayā sāhil mujhe

maujoñ meñ Dūbtī huī surḳhī thī shaam kī
dil dasht-e-pur-sukūt thā dariyā qarār thā

guhar kam haiñ ḳhazaf-reze ziyāda
abhī kuchh aur dariyā ko khañgālo

saaf kahtā hai ki tū nekī kar aur dariyā meñ Daal
dil mirā detā hai mujh ko aaj nekī kī salāh

dasht-paimā.ī meñ bhī vahshat-e-jāñ itnī na thī
tishnagī sāhil-e-dariyā pe hirāsāñ kyuuñ hai

hai dariyā meñ kachchā ghaḌā sohnī
kināre pe gum-sum mahivāl hai

'dāġh' ko mehr kahā ashk ko dariyā ham ne
aur phir karte haiñ chhoToñ kī baḌā.ī kyūñkar