Tags-Dariya

sailāb kā guzar bhī to logoñ kī maut hai
dariyā kā bāñjh-pan jahāñ nahroñ kī maut hai

ajiib ḳhvāb thā ta.abīr kyā huī us kī
ki ek dariyā havāoñ ke ruḳh pe bahtā thā

beach dariyā ke maiñ dariyā to badal saktā huuñ
apnī kashtī ko badalnā nahīñ aatā hai mujhe

hai us ko bahut quvvat-e-bāzū pe bharosā
dariyā ke shanāvar ne samundar nahīñ dekhā

jhukne nahīñ detī hai anā tishna-labī ko
dariyā kī taraf maiñ ne palaT kar nahīñ dekhā

jo sail-e-ashk o āh-e-garm ko Tuk dījiye ruḳhsat
nishāñ dariyā kā gum ho naam ho nāyāb ātish kā

maiñ to thā bikhrā huā sāhil kī piilī ret par
aur dariyā meñ thā niilā āsmāñ Duubā huā

qatra dariyā meñ jo mil jaa.e to dariyā ho jaa.e
kaam achchhā hai vo jis kā ki ma.aal achchhā hai

bahte dariyā se sabhī sairāb haiñ lekin mujhe
sirf ik qatra milā bas hoñT giile ho ga.e

be-vasīla baat ban saktī nahīñ
mil ga.ī kashtī to dariyā paar hai

yā ho jā tū dariyā kī nigāhoñ meñ tarāzū
yā tishna-labī saath liye jaañ se guzar jā

idhar tum pyaas kī hurmat kā qissa chheḌ baiThe ho
udhar mausam ye kahtā hai ki dariyā dekhte rahiye

apne sāhil pe maiñ ḳhud tishna-dahan baiThā huuñ
dekh dariyā kī tarā.ī se nikal kar mujh ko

chashm-e-gardūñ phir tamāzat apnī barsāne lagī
phir zamīñ minna-kash-e-dariyā nazar aane lagī

ho ga.ī ḳhatm sarāboñ meñ bhaTaktī huī ziist
dil meñ hasrat hī rahī dasht meñ dariyā bhī na thā

aag dariyā ko ishāroñ se lagāne vaalā
ab ke rūThā hai bahut mujh ko manāne vaalā

sunā hai Duub ga.ī be-hisī ke dariyā meñ
vo qaum jis ko jahāñ kā amiir honā thā

muddat guzrī duur se maiñ ne ek safīna dekhā thā
ab tak ḳhvāb meñ aa kar shab bhar dariyā mujh ko Dastā hai

tum vo dariyā ki chaḌhe bhī to ghaḌī bhar ke liye
maiñ vo qatra huuñ jo gir ke bhī samundar dekhe

ḳhushk hī kyuuñ na ho jaa.e dariyā mirā lahr ban ban ke maiñ
DhūñDhnā chhoḌ duuñ ḳhushkiyoñ kā sirā dil nahīñ māntā