Tags-Dariya

ḳhushī kī bazm meñ ham-raqs haiñ sabhī lekin
karegā paar mire saath ġham kā dariyā kaun

labālab dukh se thā qissa hamārā
magar chhalkā nahīñ dariyā hamārā

ajab taptī huī miTTī hai apnī
ubaltā rahtā hai dariyā hamārā

bahtā hai chup-chāp bichhaḌ kar choTī se
dariyā kī pur-shor ravānī ḳhatm huī

ek hī chullū hai kaafī ahl-e-ġhairat ke liye
Duub marne ke liye kyuuñ ḳhvāhish-e-dariyā kareñ

roz dariyā meñ jo ik phuul bahā detā huuñ
ye kisī dukh kā ishāra hai aqīdat kā nahīñ

aañkh kam-baḳht se us bazm meñ aañsū na rukā
ek qatre ne Duboyā mujhe dariyā ho kar

hai dariyā ke lams pe nāzāñ ik kāġhaz kī naav
sūraj se bāteñ kartā hai ek darīcha bahut

kab se huuñ maahī be aab zamāne kī tarah
koī nekī ho tire paas to dariyā ho jā.ūñ

dariyā baalū moram Dho kar laatā hai
maiñ us kā sab maal uḌā le aatā huuñ

aañsū aañsū jis ne dariyā paar kiye
qatra qatra aab meñ uljhā baiThā hai

paḌho har mauj aayat kī tarah hai
vo dariyā par musalsal likh rahā hai

har sail-e-ashk sāhil-e-taskīñ hai āj-kal
dariyā kī mauj mauj kinārā hai in dinoñ

zamīñ pyāsī 'zamīr' insān bhī pyāse nahīñ rahte
agar dariyā maiñ ban jaatā agar maiñ jhiil ho jaatā

mirī pāgal tabī.at kā hai koī pair na sar
nahīñ dariyā milā to aañkh meñ sahrā rakhā hai

ḳhushk dhartī ko atā kartā huuñ saaya abr kā
qatra-e-bārāñ pe dariyā kī binā rakhtā huuñ maiñ

jazr-o-mad husn ke dariyā meñ nazar aatā hai
qābil-e-dīd hai aalam tirī añgḌā.ī kā

mere aañsū na pī sakā ab tak
yuuñ to dariyā sikhā.egā sūraj

dekh rahā hai dariyā bhī hairānī se
maiñ ne kaise paar kiyā āsānī se

gaatā huuñ mere sur meñ sur mil jaa.e us kī lahroñ kā
merī aañkh meñ aañsū dekhe to phir apnī aañkh bhare dariyā