Tags-Dariya

kahīñ barf lapeTe baiThā hai kahīñ ret bichhā kar leTā hai
kabhī jañgal meñ Derā Daale kabhī bastī aan base dariyā

maiñ apnī use sunātā huuñ vo apnī mujhe sunātā hai
maiñ chup to vo bhī chup hai aur maiñ kahūñ to baat kahe dariyā

gaatā huuñ mere sur meñ sur mil jaa.e us kī lahroñ kā
merī aañkh meñ aañsū dekhe to phir apnī aañkh bhare dariyā

kabhī sar pe chaḌhe kabhī sar se guzre kabhī paañv aan gire dariyā
kabhī mujhe bahā kar le jaa.e kabhī mujh meñ aan bahe dariyā

ai shā.er! terā dard baḌā ai shā.er! terī soch baḌī
ai shā.er! tere siine meñ is jaisā laakh bahe dariyā

bolte rahnā kyūñki tumhārī bātoñ se
lafzoñ kā ye bahtā dariyā achchhā lagtā hai

safar ye pāniyoñ kā jab mujhe be-āb kartā hai
maiñ dariyā kī rupahlī ret ko bistar banātā huuñ

dil meñ tire ḳhulūs ke dariyā the gar ravāñ
sho.ale kahāñ se phir tirī āñkhoñ meñ aa ga.e

ek dariyā uThā ke laayā gayā
dasht-e-karb-o-balā meñ rakkhā gayā

shab-e-hayāt guzārī sabhī ne ḳhvāboñ meñ
ham hī ko raas na aa.e habāb dariyā meñ

ye tishnagī to azal se hai ham-safar apnī
maiñ kal pahāḌ par tishna thā aaj dariyā meñ

zarf se baḌh ke ho itnā nahīñ māñgā jaatā
pyaas lagtī hai to dariyā nahīñ māñgā jaatā

ab tak maidānoñ ke jism chamakte haiñ
jaane kaisī miTTī dariyā chhoḌ gayā

jo tire ḳhitta-e-be-āb kī ḳhvāhish na banā
kulbulātā hai vo dariyā kisī kohsār meñ gum

ye tishnagī to milī hai hameñ virāsat meñ
hamāre vāste dariyā koī udaas na ho

ye sulagtā huā sahrā hai nishānī us kī
rāsta bhuul gayā thā koī dariyā apnā

ho ke bāġhī aañkh se aañsū girā ruḳhsār par
sohbat-e-hijrāñ vahī dariyā huā achchhā huā

uryāñ-badanī par na habāboñ kī paḌe aañkh
dariyā meñ mirī jaan nahānā nahīñ achchhā

kitnā gahrā hai ishq kā dariyā
is kī tah meñ Dubo ga.iiñ āñkheñ

ghar to bahā ke le gayā ḳhāshāk kī tarah
dariyā na chhoḌ mujh ko akelā ki maiñ bhī huuñ