Tags-Dariya

āstīn-e-mauj dariyā se judā hotī nahīñ
rabt terā chashm se kyuuñ āstīñ jaatā rahā

ek taklīf kā dariyā hai badan meñ lekin
baiTh kar is ke kināre nahīñ ro saktā maiñ

dhuup dariyā pe nazar rakhtī hai
tujh ko kuuze meñ chhupā luuñ paanī

ishq kā josh dil ke dariyā meñ
boltā har habāb ishq-allāh

udhar us paar jaanā chāhtā huuñ
magar dariyā kā pul TuuTā huā hai

paiham diyā pyāla-e-mai barmalā diyā
saaqī ne iltifāt kā dariyā bahā diyā

Dūbte kaise barf jamī thī dariyā meñ
sāñsoñ se pighlā nahīñ paa.e ham bhī to

ḳhushk dariyā paḌā hai ḳhvāhish kā
ḳhvāb dekhā thā ham ne bārish kā

zikr-e-tūfāñ bhī abas hai mutma.in hai dil mirā
nāḳhudā tum ho to phir dariyā mirā sāhil mirā

tumhārā lahja to dariyā hai bahte paanī kā
ye aag ban ke samundar meñ kyuuñ bhaḌaktā hai

dariyā hai rukā huā hamārā
sahrā meñ ret bah rahī hai

varna ik din le Dūbegā vo ham ko
us dariyā se jald kināra karnā hai

donoñ chashmoñ se marī ashk bahā karte haiñ
maujzan rahtā hai dariyā ke kināre dariyā

jañg-e-abbās-e-dilāvar kā bayāñ paḌhte hue
sāmne āñkhoñ ke lahrātā hai dariyā kyā kyā

shāh-rāhoñ par ukhḌe ukhḌe saañs paḌe the
dariyā bhārī shahr ke nīche dabā huā thā

ruke hue haiñ jo dariyā unheñ ravānī de
tū apne hone kī mujh ko koī nishānī de

kabhī hai mānind-e-mauj-e-dariyā kabhī hai misl-e-ġhubār-e-sahrā
kahūñ maiñ kyā haal apne dil kā bichhaḌ ke mujh se ravāñ-davāñ hai

ḳhud hī samundar ḳhud hī dariyā Dar kaisā
jab chāheñge ḳhud ko ḳhud meñ samo leñge

zamāna jāntā hai kaun thā jo paar utrā
ki tū ne pyaas aur darbār ne dariyā chunā thā