Tags-Dariya

chaḌhe dariyā meñ TuuTī naav khenā
kahānī zindagī kī muḳhtasar hai

hamārī pyaas ko zanjīr bāñdhī jaatī hai
tumhāre vāste dariyā bahāyā jaatā hai

ek dariyā chalā aayā hai mire saath ise
rokne ke liye dīvār uThā.ī jaatī

sho.ala majbūr ho dariyā pe machalne ko 'zafar'
kisī din dasht se chashme ko ubalnā paḌ jaa.e

durust hai ki vo jañgal kī aag thī lekin
vahīñ qarīb hī dariyā bhī ik guzartā thā

kitābeñ pheñk do dariyā meñ saarī
paḌhoge ḳhud ko to achchhā lagegā

har ik manzar vahīñ Thahrā lagegā
kabhī dariyā kabhī sahrā lagegā

bahāyā mazāmīn kā tum ne dariyā ġhazal meñ bahut ḳhuub ash.ār likkhe
zamāne ko ai 'nūh' hairat na kyuuñ ho ki tūfān aisā zamīn aisī gaḌbaḌ

'bahr' pañkhā haath se rakh do nihāyat zaar huuñ
mauj-e-dariyā kī tarah mujh ko kuchaltī hai havā

kaun se sāhil par ye safīne apnā lañgar kholeñge
ruḳh pe havā ke ho leñge to dariyā dariyā Doleñge

is qadar TuuT ke milne meñ hai nuqsān ki jab
khet pyāse hoñ to dariyā nahīñ chhoḌā jaatā

raat badan-dariyā meñ roz utartī hai
is kashtī meñ ḳhuub savārī kiyā karo

dil meñ basī haiñ kitnī tire ba.ad bastiyāñ
dariyā thā ḳhushk ho ke jazīroñ meñ baT gayā

rauñd jaatā hai ye kināroñ ko
ise dariyā kaheñ? mavālī hai

sozish ga.ī na dil kī rone se roz-o-shab ke
jaltā huuñ aur dariyā bahte haiñ chashm-e-nam se

be-qarār haiñ āñkheñ kaise ab lahū ro.eñ
ḳhushk kar diyā dariyā dil dukhāne vāloñ ne

mauj-e-tūfāñ se nikal kar bhī salāmat na rahe
nazr-e-sāhil hue dariyā ke shanāvar kitne

raat kā pichhlā pahar kaisī nishānī de gayā
munjamid ā.ankhoñ ke dariyā ko ravānī de gayā

maiñ ne dariyā ke havāle kar diyā hai tan-badan
maujoñ kī rau meñ ḳhamoshī se bahā jaatā huuñ maiñ