Tags-Dariya

dīda-e-namnāk se dariyā bahā
āh-e-sho.ala-bār se mahshar tarāsh

ḳhuun shiryānoñ kā āñkhoñ meñ dikhā.ī de sake
tū bhī dariyā hai agar 'shāhid' to tuġhyānī meñ aa

ḳhālī kashtī sāhil par
chaḌhtā dariyā chaḌhtā din

raat kinārā dariyā din
raat ke pīchhe bahtā din

ek dariyā sambhal sambhal ke chalā
ek kashtī qadam qadam Dolī

maiñ jāntā huuñ magar mujhe us fareb meñ lutf aa rahā hai
sarāb hai vo jise mirī tishnagī ne dariyā banā diyā hai

maiñ bhī ruk jā.ūñ magar ruk nahīñ paatā 'ālam'
ek dariyā sā sadā mujh meñ ravāñ rahtā hai

ham sāhil kī sard havā meñ ḳhvāboñ se uljhe haiñ 'faroġh'
aur hamāre naam kā dariyā sahrā sahrā bahtā hai

ravāñ thī koī talab sī lahū ke dariyā meñ
ki mauj mauj bhañvar umr kā safīna thā

is tarah paḌhtā huuñ bahte hue dariyā kī kitāb
saf.ha-e-āb par ik aks-e-payām aa.egā

do jhīleñ us kī āñkhoñ meñ lahrā ke so ga.iiñ
us vaqt merī umr kā dariyā chaḌhā na thā

dekh kar us ko mujhe dhachkā lagā
misl-e-dariyā thā magar pyāsā lagā

dasht ke ḳhema-e-dariyā meñ makīñ koī thā
tishnagī tere tamāshe meñ kahīñ koī thā

pahāḌ kāTne vaale zamīñ se haar ga.e
isī zamīn meñ dariyā samā.e haiñ kyā kyā

shahr tū apne gande paañv pasāre dariyā ke kināre leTā hai
aur tere siine par reñgtī huī chyūñTiyāñ sūraj ko ghuur rahī haiñ

yuuñ chashm-e-tar se chehre par aañsū hue ravāñ
dariyā se jaise laave koī nahr kaaT kar

bhar aa.iiñ us kī āñkheñ
phir dariyā kashtī meñ thā

maiñ bhī gum maazī meñ thā
dariyā bhī jaldī meñ thā

bikhrī huī hai ret nadāmat kī zehn meñ
utrā hai jab se jism kā dariyā chaḌhā huā

tumhārī aañkh kī gahrā.iyoñ kā kyā taqābul ho
nadī se jhiil se dariyā se jharne se samundar se