Tags-Dariya

ye ilāqa na ho dariyā kī amal-dārī meñ
maiñ jahāñ naav ko zanjīr kiye jaatā huuñ

sūraj ko zarā kuchh Dhalne do kuchh vaqt kā dariyā bahne do
jo dhuup abhī tak sar par hai vo paañv talak aa jā.egī

sab dariyā meñ Duub rahe haiñ
sab kī nayyā paar hai sāhab

ik piilī chamkīlī chiḌiyā kaalī aañkh nashīlī sī
baiThī hai dariyā ke kināre merī tarah akelī sī

gar tū mushtāq hai dilbar safar-e-dariyā kā
aa ke kar mauj mire dīda-e-giryān meñ aa

niklā huuñ lafz lafz se maiñ Duub Duub kar
ye terā ḳhat hai yā koī dariyā chaḌhā huā

aa ke jo sairāb kartī hai zamīn-e-ḳhushk ko
asl meñ hai mauj-e-dariyā shor-e-dariyā kuchh nahīñ

hamārī chāhateñ sach haiñ magar hālāt kā dariyā
mujhe is paar rakhtā hai tujhe us paar rakhtā hai

kināre baiTh kar ke koī bhī manzil nahīñ paatā
jo Takrātā hai lahroñ se vo dariyā paar hotā hai

dekhnā chāheñ to sāhil par liye manzar bahut
Dūbnā chāheñ to koī mauj-e-dariyā kam nahīñ

aañkh vo aañkh jo har qatre meñ dariyā dekhe
tū magar sāmne aa jaa.e to phir kyā dekhe

dariyā meñ duur duur talak kashtiyāñ na thiiñ
ḳhatra na thā havā ko kisī bādbān kā

ham apne raste se haT ga.e haiñ bhaTak ga.e haiñ
na koī sahrā na koī dariyā suno ġhazāla

dariyā se uḌtī havā
apnī lahroñ-bharī shaal phailā.e

maiñ is jānib tū us jānib
biich meñ patthar kā dariyā thā

sūkhī dhartī sun letī hai paanī kī āvāzoñ ko
pyāsī āñkheñ bol uThtī haiñ ham ne ik dariyā dekhā

dasht-o-dariyā ke ye us paar kahāñ tak jaatī
ghar kī dīvār thī dīvār kahāñ tak jaatī

nahīñ ārām mujh ko iztirāb-e-dil se siine meñ
ki dariyā muztarib hotā hai betābī-e-māhī meñ

kuñ.eñ jo paanī kī bin pyaas chaah rakhte haiñ
magar nahañg bhī dariyā kī thaah rakhte haiñ

sirf āñkhoñ meñ namī se na banegī koī baat
ek dariyā sā ravāñ ho to ġhazal hotī hai