Tags-Dariya

sahrā par mauqūf nahīñ
dariyā bhī to pyāsā hai

kināra thā mire dariyā se kaT gayā vo shaḳhs
ki maiñ thā vaqt kī sarhad ko paar kartā huā

dariyā hai bahtā paanī har mauj hai ravānī ruktī nahīñ kahānī
jitnā likhā gayā hai itnā hī vāqi.a ho ye baat to ġhalat hai

dil thā pahlū meñ to kahte the tamannā kyā hai
ab vo āñkhoñ meñ talātum hai ki dariyā kyā hai

nuur jo us meñ hai ḳhurshīd meñ vo nuur kahāñ
ye agar husn kā chashma hai to dariyā hai vo ruḳh

vaqt ke tez gaam dariyā meñ
tū kisī mauj kī tarah ubhrī

is taraf aag kā dariyā hai udhar dār-o-rasan
dil vo dīvāna ki jā.egā magar jā.egā

bujhtī āñkhoñ ko kisī nuur ke dariyā kī talāsh
TūTtī saañs ko zanjīr zarūrat koī

sulagtī ret ke us paar ishq kā dariyā
mire ḳhayāl se paañv jalā liyā jaa.e

saare dariyā haiñ yahāñ mauj meñ apnī apnī
mire sahrā ko nahīñ in se shikāyat koī

tū ik bahtā dariyā chauḌe chakle paaT
aur bhī haiñ lekin naale barsātī haiñ

na ab vo yādoñ kā chaḌhtā dariyā na fursatoñ kī udaas barkhā
yūñhī zarā sī kasak hai dil meñ jo zaḳhm gahrā thā bhar gayā vo

kabhī ye larzisheñ sāz-āshnā hoñgī to dekhoge
diloñ kī be-kalī āshob-e-dariyā ho ga.ī āḳhir

ik lamhe ne jīvan-dhārā rok liyā
jaise kisī qatre ne dariyā rok liyā

ek sī saarī sub.heñ ek sī shāmeñ haiñ
kis ne 'akbar' bahtā dariyā rok liyā

na.ī tahqīq ne qatroñ se nikāle dariyā
ham ne dekhā hai ki zarroñ se zamāne nikle

hai ishq jañg to phir jiit leñ chalo ham log
hai dariyā aag kā to paar kar ke dekhte haiñ

ai 'rashk' ho jis se dil-e-dariyā mutalātum
aisā koī andāz hī tūfāñ meñ nahīñ hai

kahīñ sahrā meñ bhī Das le na hameñ sairābī
ret ke batn se phunkārtā dariyā niklā

utarte vaqt paanī meñ zarā ye dekh lenā thā
ki andar beach meñ jā kar yahī dariyā badaltā hai