Tags-Dariya

ḳhumār-e-tishna-labī meñ ye kaam kar aa.e
ham apnī pyaas ko dariyā ke naam kar aa.e

shaq āfiyat-kanār kināre ko kar ga.ī
dariyā kī mauj sar ko paTak kar guzar ga.ī

dil ke dariyā ne kināroñ se mohabbat kar lī
tez bahtā hai magar kam nahīñ hone paatā

merā saaya ho ki maiñ koī to dhokā hai zarūr
ghar meñ ā.īna ki ghar se pare dariyā dekhūñ

tujh meñ dariyā koī kis sahāre chale maiñ jo pachchhim to pūrab ko dhāre chale
merī kashtī kināre kināre chale terī maujoñ ko ye bhī gavārā na thā

tū ne siine ko jab tak ḳhalish dī na thī tū ne jazboñ ko jab tak ubhārā na thā
maiñ vo dariyā thā jis meñ ki lahreñ na thiiñ maiñ vo qulzum thā jis meñ ki dhārā na thā

ye dariyā hai guzar jaanā hai is ko
musāfir ho tum apnā rāsta lo

Duub gayā shab ke dariyā meñ
chāñd bhī bas ik qatra niklā

chaTān meñ bhī ravāñ hai dariyā
chhapā hai dariyā chaTān meñ bhī

sāhil kī baḌhā ke tishnagī mauj
dariyā kī taraf palaT ga.ī hai

tū nadī naale ko har taur baham rakh paanī
vo to chāhegā ki dariyā meñ ravānī na rahe

havā.eñ paiġhām de ga.ī haiñ ki mujh ko dariyā bulā rahā hai
maiñ baat saarī samajh gayā huuñ mujhe duāoñ meñ yaad rakhnā

vo dariyā motiyoñ kā ham se rūThā ho to phir yaaro
bhalā kyūñkar na barsā de hamārī chashm-e-tar motī

maiñ ne kahā ye mauj se dariyā kā kyā huā
kahne lagī ke siip ke motī meñ aa ke dekh

kaise pyaas bujhāte dariyā ret kā dariyā niklā
lahr lahr meñ mauj chhupī thī dhoke meñ thī āñkheñ

aag kyā sard huī barf ko paanī kar ke
ham bhī dariyā hue mahsūs ravānī kar ke

vaqt kā dariyā le bhī gayā vo sab jo dil-o-jāñ se thā aziiz
DhūñDh rahe ho sāhil par ab aañsū kī tahrīr kahāñ

aur phailegā aag kā dariyā
aur jhulsegī khaal chehroñ kī

ek dariyā paar kar ke aa gayā huuñ us ke paas
ek sahrā ke sivā ab darmiyāñ koī nahīñ

zabt kartā huuñ vale is par bhī hai ye josh-e-ashk
gir paḌā jo aañkh se qatra vo dariyā ho gayā