Tags-Dariya

har qatra dariyā banñe ko betāb dikhā.ī detā hai
har mauj-e-ravāñ bechain nazar aatī hai firāq-e-sāhil meñ

kahīñ sahrā meñ jo dariyā dekheñ
ham bhī ā.īne meñ chehrā dekheñ

ham kahāñ kho.e rahe der talak
dekh kar aks-e-shajar dariyā meñ

kis ne chupke se kahā Duub hī jā
kaun thā pichhle pahar dariyā meñ

ham na bhūle kabhī un āñkhoñ ko
vo charāġhoñ kā safar dariyā meñ

mauj-dar-mauj thiraktī rahī raat
chāñd kī ujlī gagar dariyā meñ

duur tak aa.iiñ nazar dariyā meñ
kashtiyāñ garm-e-safar dariyā meñ

āb-jū ham haiñ pa dariyā ke hamāre sabhī ḳhvāb
radd-e-ta.abīr kī barsāt meñ bah jaate haiñ

launcher rocket Clashnikof bārūdī surañgeñ
ḳhuun kā dariyā pahāḌoñ meñ ravāñ chāroñ taraf hai

jis se vābasta rahe Dūbne vaale kī umiid
ek tinkā hī sahī tum lab-e-dariyā rakh do

badan kī pyaas bhī ik māvarā kahānī hai
har ek buuñd ko dariyā ḳhayāl kar dekho

vo khurdurī chaTāneñ vo dariyā vo ābshār
sab kuchh sameT le ga.ī apne paroñ meñ raat

ik aañkh hai dariyā āñkhoñ kā har manzar us meñ Duub gayā
ik chehra sahrā chehroñ kā aur ham sab is meñ rahte haiñ

ḳhushk lamhāt ke dariyā meñ bahā de mujh ko
marg-e-ehsās kī suulī pe chaḌhā de mujh ko

Thahrā thā jahāñ aa kar ik qāfila pyāsoñ kā
us raah se jab guzrā dariyā to bahut royā

maTiyāle maTiyāle bādal ghuum rahe haiñ maidānoñ ke phailāv par
dariyā kī dīvānī maujeñ humak humak kar hans detī haiñ ik naav par

yuuñ guzartā hai mulāqāt kā har ik lamha
jaise lamhāt kā dariyā ye ravāñ hotā hai

jaane kis ghaaT lage umr kī kashtī 'ahmad'
ḳhud ko sūkhe hue dariyā meñ bahā aayā huuñ

apne aañsū bhī kiye nazr kisī paanī ke
pyaas dariyā kī bahar-taur bujhā aayā huuñ

ḳhuun meñ shāmil achhūtī ḳhushbuoñ ke saath saath
kyuuñ kahūñ mujh meñ jo bahtā hai vo dariyā jhuuT hai