Tags-Dariya

zaḳhm-e-dil aur harā ḳhūn-e-tamannā se huā
tishnagī kā mirī āġhāz hī dariyā se huā

kabhī aisā bhī hotā hai ki dariyā
liye tūfāñ hazāroñ apne andar

dariyā haiñ 'mīr'-o-'ġhālib' har lab pe jo ravāñ haiñ
'faiz' o 'firāq' aur 'dāġh' har dil pe hukmarāñ haiñ

dukh ko samt-shanāsā.ī dī ġham ke qurbat-dāroñ ne
dil dhārā dariyā mil kar bahra-mand huā

huā ḳhatm dariyā to sahrā lagā
safar kā tasalsul kahāñ jā lagā

mujh shanāvar ko Dubo sakte nahīñ donoñ harīf
maiñ bhī tūfān kā dariyā kā hunar jaan gayā

kahīñ dariyā kahīñ vaadī kahīñ kohsār banī
kahīñ sho.ala kahīñ shabnam kahīñ gulzār banī

umr bhar manzar-nigārī ḳhuun meñ utrī rahī
phir bhī āñkhoñ ke muqābil ek dariyā rah gayā

qatra huuñ maiñ vus.at de dariyā kar de
tū chāhe to sāgar ko sahrā kar de

dil ko dariyā ko baḌī der huī ḳhushk hue
koī bādal hī mirī pyaas bujhāne aa.e

zindagī kā diyā huā chehrā ishq-dariyā meñ dho ke aa.e haiñ
'farhatūllāh'-ḳhāñ ga.e the vahāñ farhat-ehsās ho ke aa.e haiñ

peḌ kā saayā nahīñ TuuTā huā patta huuñ
mujh ko jazbāt ke dariyā meñ na Thahrāyā kar

ham-kinārī kī havas ai gauhar-e-yaktā ye hai
aab ho kar ġham se dil dariyā hamārā ho gayā

bahne lagūñ kināroñ ko chhūte hue kahīñ
dariyā ke lahr lahr machalne meñ aa rahūñ

maujeñ dariyā ke siine par kyā likhtī haiñ
sochā to maiñ andar andar zaḳhmī hogā

uryāñ na vo nahāyā hammām ho ki dariyā
chashm-e-hubāb ne bhī us kā badan na dekhā

tairne ke liye dariyā bhī hai kaafī lekin
shauq kahtā hai samundar bhī mujhe chāhiye hai

os kī buuñd bhī ab sañg-sifat lagtī hai
phuul ke baaġh ko dil aag kā dariyā jaane

dhuup kī gard fazāoñ meñ diloñ meñ tābūt
har nafas ḳhud ko bas ik aag kā dariyā jaane

duur tak Thahrā huā jhiil kā paanī huuñ maiñ
terī parchhā.īñ jo paḌ jaa.e to dariyā ho jā.ūñ