Tags-Dariya

aur kisī sāhil par jā kar ubharūñgā ek aur badan meñ
miTTī chhoḌ rahā huuñ maiñ mujh ko dariyā meñ utarne denā

kamar dhokā dahan uqda ġhazāl āñkheñ parī chehra
shikam hiirā badan ḳhushbū jabīñ dariyā zabāñ iisā

anā ko liye kab se baiThā hai dariyā
jagah se samundar bhī hiltā nahīñ hai

saarā din dariyā kināre ret par
naam likhā merā aur miTā diyā

ik ḳhitta-e-ḳhūñ meñ kahīñ dariyā ke kināre
dīvār-e-zamāna se girā dhyān phisal kar

rabt hai husn o ishq meñ bāham
ek dariyā ke do kināre haiñ

mirī āñkhoñ kā ye dariyā ajab hai
ki bahtā hai to phir thamtā nahīñ hai

dariyā thā mauj ġham thī safīna koī na thā
tārīk rāste the ujālā koī na thā

ye ghar-bār hai dīda-e-ashk-za se
mirā dāman āġhosh-e-dariyā huā hai

ye ishq nahīñ āsāñ itnā hī samajh liije
ik aag kā dariyā hai aur Duub ke jaanā hai

ik shor sameTo jīvan bhar aur chup dariyā meñ utar jaao
duniyā ne tum ko tanhā kiyā tum is ko tanhā kar jaao

ubuur dariyā ko kartā rahā magar ik baar
hue jo shal mire baazū to be-kanār lagā

ye ishq nahīñ āsāñ itnā hī samajh liije
ik aag kā dariyā hai aur Duub ke jaanā hai

kaun samjhā.e tirī sar-phirī kashtī ko 'salīm'
ḳhūnīñ dariyā se paḌā hai tirā paalā pāgal

kashtī bhī nahīñ badlī dariyā bhī nahīñ badlā
aur Dūbne vāloñ kā jazba bhī nahīñ badlā

ġham ke bādal phir bhī chhā.e rah ga.e
aañkh se dariyā ke dariyā bah ga.e

piitā rahā dariyā ke tamavvuj ko shanāvar
hoñToñ pe nadī ke bhī ajab tishna-labī thī

na chaTānoñ kī salābat hai na dariyā kā jalāl
log tinke haiñ jo har mauj meñ bah jaate haiñ

ulfat ne tirī ham ko to rakkhā na kahīñ kā
dariyā kā na jañgal kā samā kā na zamīñ kā

kaise dariyā ko karūñ paar ki mere mohsin
naav to dete haiñ patvār nahīñ dete haiñ