Tags-Dariya

maiñ abhī ik buuñd huuñ pahle karo dariyā mujhe
phir agar chāho karo vābasta-e-sahrā mujhe

is kī kyā ta.abīr karūñ maiñ kuchh tū hī samjhā 'manzūr'
maiñ ne ḳhvāb meñ dekhā sahrā meñ ik dariyā bikhrā hai

qatre qatre ko taraste haiñ vo ab ahl-e-havas
jo kabhī dhartī se har dariyā uThā kar le ga.e

sāhil pe us kī ja.ad-e-musalsal ke aks se
dariyā meñ dhobiyoñ ko nazar aa.e paaT saañp

dariyā meñ sar ke baal koī dho gayā magar
lahroñ ke ho rahe haiñ jo yuuñ baara baaT saañp

zarā dariyā kī tah tak to pahuñch jaane kī himmat kar
to phir ai Dūbne vaale kinārā hī kinārā hai

reg-e-sahrā kā ajab rañg havāoñ ne kiyā
naqsh sā khiñch gayā dariyā kī ravānī kī tarah

sar uThāo na kanār-e-dariyā
mauj ko sar se guzar jaane do

aag bahte hue paanī meñ lagāne aa.ī
tere ḳhat aaj maiñ dariyā meñ bahāne aa.ī

kah denā samundar se ham os ke motī haiñ
dariyā kī tarah tujh se milne nahīñ ā.eñge

ye to dariyā haiñ jo aape se guzar jaate haiñ
josh meñ varna samundar nahīñ aayā ab tak

jab tak barf pighaltī yā barkhā rut aatī
dariyā aur bhī kaam meñ laayā jā saktā thā

hamārī pyaas ne vo bhī nazāra dekh liyā
ravāñ-davāñ koī dariyā sarāb jaisā thā

ham ko bharam ne bahr-e-tavahhum banā diyā
dariyā samajh ke kuud paḌe ham sarāb meñ

kyā batā.ūñ maiñ lab-e-dariyā se
kuchh taqāzā hai abhī tak merā

hai zarra zarra bhī sahrā hai qatra qatra bhī dariyā
samjho na to aiman hai patthar patthar ko jo samjho tuur bhī hai

safīna Dūbne ke ba.ad in bātoñ se kyā hāsil
jo dariyā thā to dariyā thā jo sāhil thā to sāhil thā

collage ke sab bachche chup haiñ kāġhaz kī ik naav liye
chāroñ taraf dariyā kī sūrat phailī huī bekārī hai

vādī-e-qirtās meñ bahtā huuñ maiñ
ābshār-e-fikr kā dariyā huuñ maiñ

vo ḳhuuñ bahā ki shahr kā sadqa utar gayā
ab mutma.in haiñ log ki dariyā utar gayā