Tags-Dariya

mayassar se ziyāda chāhtā hai
samundar jaise dariyā chāhtā hai

maiñ din ko raat ke dariyā meñ jab utaar aayā
mujhe zamīn kī gardish pe e'tibār aayā

zindagī mujh ko kahāñ le aa.ī hai
sāmne dariyā hai pīchhe khaa.ī hai

kyā zamīñ kyā āsmāñ kyā dasht-o-dariyā
aadmī kī bartarī chāroñ taraf hai

ho na jab tak usī kā fazl-o-karam
qatra dariyā 'jigar' nahīñ hotā

jab dariyā kī chaal samajh meñ aatī hai
log kināroñ par bhī Darne lagte haiñ

vo dariyā hijr kā thā tund dariyā
udāsī ke bhañvar achchhe lage the

jaane kis dariyā se ḳhushbū bāñdh kar laatī hai ye
dekhiye to jāda-e-mauj-e-sabā miltā nahīñ

jis aag ko kahte haiñ qayāmat se nahīñ kam
bahtā hai usī aag kā dariyā mire dil meñ

ek nazar dekhā thā us ne aage yaad nahīñ
khul jaatī hai dariyā kī auqāt samundar meñ

mire vajūd se dariyā kā aks dekhoge
kahīñ kahīñ to samundar dikhā.ī detā hai

jhiil āñkheñ sarāhne vaalā
in ko dariyā banā gayā to phir

sāhiloñ kī qaid se āzād ho saktā hai tū
apne dariyā meñ koī tūfāñ uThā merī tarah

bahtā huā dariyā huuñ kahīñ par thā kahīñ huuñ
maiñ lamha-e-maujūd kā pāband nahīñ huuñ

barf kā ik ik aañsū pī kar
dariyā vajd meñ aa jaatā hai

palaT ke aañkh meñ vo mauj-e-ḳhūñ nahīñ aa.ī
chaḌhe hue the jo dariyā utar ga.e hoñge

dariyā to aur bhī the zamāne meñ be-shumār
āb-e-hayāt chashma-e-haivāñ kiyā gayā

koī naav kahīñ mañjdhār meñ Duube chāñd se uljhe aur udhar
maujoñ kī vahī halqa-bandī dariyā kī vahī tuġhyānī ho

ik manzar meñ saare manzar pas-manzar ho jaane haiñ
ik dariyā meñ mil jaanī haiñ lahreñ sab dariyāoñ kī

soch bhī us din ko jab tū ne mujhe sochā na thā
koī dariyā dasht ke atrāf meñ bahtā na thā