Tags-Dariya

kyā ye bhī mohabbat ke taqāzoñ meñ hai shāmil
dariyā meñ nazar aayā to sahrā nazar aayā

girte haiñ samundar meñ baḌe shauq se dariyā
lekin kisī dariyā meñ samundar nahīñ girtā

hue mar ke ham jo rusvā hue kyuuñ na ġharq-e-dariyā
na kabhī janāza uThtā na kahīñ mazār hotā

sāhil par jab sabz farishte hī rahte haiñ
dariyā meñ phir kis ne zahr milāyā hogā

khārī paanī kī jhīleñ sab bach jā.eñgī
luqma siyāh samundar kā bas dariyā hogā

itnī sī dāstān hai kāġhaz kī naav kī
dariyā hai aur us meñ ravānī hai aur bas

na ho jo sat.h pe halchal to is se ye na samajh
chaḌhā huā thā jo dariyā utar gayā hogā

'bahr' pañkhā haath se rakh do nihāyat zaar huuñ
mauj-e-dariyā kī tarah mujh ko kuchaltī hai havā

mirī kashtī meñ koī chhed kar do
mujhe dariyā nihatthā lag rahā hai

ruk gayā aañkh se bahtā huā dariyā kaise
ġham kā tūfāñ to bahut tez thā Thahrā kaise

jidhar ko mirī chashm-e-tar jā.egī
udhar kaam dariyā kā kar jā.egī

dil apnī talab meñ sādiq thā ghabrā ke sū-e-matlūb gayā
dariyā se ye motī niklā thā dariyā hī meñ jā kar Duub gayā

buland peḌoñ ke sabz pattoñ meñ sat.h-e-dariyā kī silvaToñ par
havā ke jhoñkoñ se dhuup ke jhilmilāte taare thirak rahe haiñ

chaḌhtā dariyā ek na ik din ḳhud hī kināre kāTegā
apne hañste chehre kitne tūfānoñ ko chhupā.eñge

us se hazār dariyā lipaTne ko muntazir
phir kis ke intizār meñ sāgar niDhāl hai

dariyā jaisā sahrā de
us meñ ek jazīra de

tamām kunde (tū jāntī hai)
jo sat.h-e-dariyā pe saath dariyā ke tairte haiñ

dariyā kī tarah arsa-e-gul meñ hai ravāñ kyā
bādal kī tarah dekh havāoñ meñ Thahar ke

jaise ik dariyā chūme sahrāoñ ko
tere lams pe aise ham ābād hue

hue haiñ is qadar mānūs ham paimān-e-fardā se
ki ab dil kā safīna hijr ke dariyā meñ rakhte haiñ