Tags-Dariya

dariyā ke kināre pe mirī laash paḌī thī
aur paanī kī tah meñ vo mujhe DhūñD rahā thā

ujaaḌ ghar meñ udaas chehra thā ya.anī maiñ thā
vo jis kī āñkhoñ meñ bahtā dariyā thā ya.anī maiñ thā

aarzū hai ki banūñ maiñ dariyā
aur tū mujh pe havā ban ke chale

agar fursat mile paanī kī tahrīroñ ko paḌh lenā
har ik dariyā hazāroñ saal kā afsāna likhtā hai

shab ke dariyā meñ uThtī hai ik mauj-e-māzī balā-ḳhez kyuuñ
lauT jaatī hai kyuuñ sāhil-hāl se sab miTātī huī

maiñ le ke aayā thā ham-rāh jin ko dariyā tak
vo log pī ga.e merī bhī pyaas kā paanī

koī dariyā hai jis kī lahreñ mujhe khīñch rahī haiñ aur koī
mirī jānib haath baḌhātā hai par jaane kaun baḌhātā hai

sāgar hai sirf dariyā kī mauzūñ ke dam se hī
ab ye bharam bhī TuuT gayā mutma.in raho

dil se Takrā jaatī hai rah rah ke koī mauj 'zeb'
shab kā sannāTā koī bahtā huā dariyā huā

ta.ajjub-ḳhez hai dariyā kā manzar
bhañvar chup haiñ kināre so rahe haiñ

baḳhīl aisā nahīñ dekhā hai dariyā
ki ham sāhil pe pyāse so rahe haiñ

guzrā huā lamha thā ki bahtā huā dariyā
phir merī taraf us ne palaT kar nahīñ dekhā

chashm-e-tar ne bahā ke jū-e-sarishk
mauj-e-dariyā ko dhaar par maarā

sāmne mere ek dariyā hai
hoñT sūkhe haiñ phir bhī pyaas nahīñ

jañgal dariyā khet ke TukḌe
yaad nahīñ ab aage kyā thā

mere pyāse hoñToñ hī se bas dariyā kī qīmat hai
tishna-labī kā muul hai saarā varna dariyā kuchh bhī nahīñ

chaḌhtā sūraj uḌtā bādal bahtā dariyā kuchh bhī nahīñ
saarā tamāshā mere liye hai lekin merā kuchh bhī nahīñ

vo hoñT jin meñ thā mīThī sī ek pyaas kā ras
maiñ jāntā to vo dariyā mire kanār meñ the

barf kā ik ik aañsū pī kar
dariyā vajd meñ aa jaatā hai

harf-e-tahajjī siikh rahā huuñ
dariyā meñ maiñ kuud gayā huuñ