Tags-Dariya

yahī vo kuuza hai dil ki rahte haiñ band jis meñ hazār dariyā
yahī vo zarra hai dar-haqīqat ki jis meñ zau āftāb kī hai

ta.abīr ke sahrāoñ meñ haiñ ḳhvāb-e-pareshāñ
dariyā ko sarāboñ se sadā dete haiñ pyāse

naġhma-e-mauj bhī mauj is kā hai dariyā gahrā
lahja-e-'mīr' kī gīrā.ī kā jaadū jaagā

is aas pe sailāb ke siine pe ravāñ huuñ
shāyad kabhī dariyā kā kinārā nazar aa.e

mirī āñkhoñ meñ tum bach kar utarnā
yahāñ ashkoñ kā ik dariyā paḌegā

chullū meñ ho dard kā dariyā dhyān meñ us ke hoñT
yuuñ bhī ḳhud ko pyāsā rakhnā kitnā mushkil hai

vo na dariyā aur na gahrī chāhateñ
sohnī aur maahī dīvāne ab kahāñ

'jāved' nazd-e-āb-e-ravāñ kah gayā faqīr
dariyā meñ jo gayā vo guzarne meñ lag gayā

muddatoñ ba.ad pashemāñ huā dariyā ham se
muddatoñ ba.ad hameñ pyaas chhupānī aa.ī

use tālāb jharne jhiil se jhaḌnā zarūrī hai
safar meñ tanhā chalne vaalā dariyā suukh jaatā hai

jāñ-ba-lab hone lagā hai pyaas kī shiddat se vo
ḳhushk registān meñ ik shaḳhs jo dariyā sā thā

manzar ālūda huā jaatā hai
kis ne dariyā meñ utāre jharne

ajiib pyaas hai dariyā se bujh nahīñ paa.ī
jo tum kaho to samundar nigal ke dekhte haiñ

har baar chhoḌ aatī huuñ dariyā meñ lahr ko
chullū meñ bhar ke mujh se uThāyā nahīñ gayā

har ik nadī se kaḌī pyaas le ke vo guzrā
ye aur baat ki vo ḳhud bhī ek dariyā thā

vahshat-afzā girya-hā mauqūf-e-fasl-e-gul 'asad'
chashm-e-dariyā-rez hai mīzāb-e-sarkār-e-chaman

shahr ho dasht-e-tamannā ho ki dariyā kā safar
terī tasvīr ko siine se lagā rakkhā hai

phailā huā thā sadiyoñ talak us kā silsila
dariyā ke saath saath baḌhī apnī pyaas bhī