Tags-Dariya

koī dariyā meñ agar kachche ghaḌe par taire
saath saath is ke bhañvar ho to ġhazal hotī hai

dekhā to ek aag kā dariyā thā maujzan
is dard-e-nā-sazā ne jise rasta kah diyā

ġhurūr-e-nāz dikhā tujh meñ kitnā jauhar hai
mirā ḳhulūs bhī dariyā nahīñ samundar hai

ye apnā apnā muqaddar hai is ko kyā kahiye
tujhe sarāb to dariyā banā diyā hai mujhe

kahāñ kahāñ mujhe rokoge band bhāñdhoge
maiñ chaḌhtā dariyā huuñ har samt bahne vaalā huuñ

ḳhud haT ga.e haiñ duur vo paanī ke zor se
dariyā ke vo kināre jo dariyā-shanās haiñ

tah-e-dariyā paḌe rahnā thā maiñ ne bhī guhar-sūrat
thī mauj-e-tund ik jis ke sahāre se nikal aayā

chaḌhā paanī zarā tū apne dhāre se nikal aayā
achānak ik jagah dariyā kināre se nikal aayā

aañkh jhuktī hai to miltī hai ḳhamoshī ko zabāñ
band hoñToñ se koī boltā dariyā nikle

ek biphrā huā dariyā hai mire chaar taraf
tū jo chāhe isī tūfāñ se kināra nikle

aag ke dariyā meñ kar ke raqs jab ham thak ga.e
raakh ke ik Dher se sāhil barāmad kar liyā

har samt rañg-o-nūr kā dariyā dikhā.ī de
har mauj-e-rañg meñ tirā chehra dikhā.ī de

ban gayā zanjīr mere paañv kī merā vajūd
qaid hai dariyā bhī apne sāhiloñ ke darmiyāñ

yaad kī lahr bahā laa.ī hai kis des mujhe
hai yahāñ vaqt kā bahtā huā dariyā patthar

dariyā dariyā naav bahe to gorī giit protī jaa.e
un gītoñ kī taan amar hai jin kā rañg judā.ī hai

ye kaisī dariyā-dilī hai saaqī havas bhī dil kī huī na puurī
jo kī ināyat bhī to adhūrī agar diyā bhī to jaam aadhā

nahīñ hotā kabhī āb-e-ravāñ par shak najāsat kā
mire ashkoñ ke dariyā meñ nahā le jis kā jī chāhe

pūchhtā rahtā huuñ maujoñ se guhar kī ḳhabreñ
ashk-e-gum-gashta kā dariyā se pata kartā huuñ

sahrā sahrā chīḳhtā phirtā huuñ maiñ
ho ke dariyā kis qadar pyāsā huuñ maiñ

qaid huuñ maiñ vus.atoñ ke bāvajūd
vo mirā sāhil hai aur dariyā huuñ maiñ