Tags-Aankh

tum mirī aañkh ke tevar na bhulā pāoge
an-kahī baat ko samjhoge to yaad ā.ūñgā

har ek aañkh meñ chaḌhtā huā anā kā nasha
har ek harf-e-vafā se mukar ga.ī duniyā

aañkh ko kaaT ke kuchh nok-palak sīdhī kī
zāviya siidh meñ aane se kahāñ bantā hai

bhāte nahīñ haiñ aañkh ko merī ye tāj-o-taḳht
jaatī nahīñ vajūd se tāsīr ḳhaak kī

hāl-e-dil kaun sunā.e use fursat kis ko
sab ko is aañkh ne bātoñ meñ lagā rakkhā hai

aañkh hai yā sair-gāh-e-roz-o-shab
vaqt hai yā jāda-e-umr-e-azīz

tumhārī aañkh ke raste tumhāre dil meñ utrūñgā
maiñ azm-o-hausla puḳhta irāda le ke aayā huuñ

in añdheroñ meñ kiran hai koī
shab-e-zūd aañkh uThā kar dekho

vahāñ se ḳhvāb koī aur le uḌā ho use
mirī nigāh tirī aañkh meñ rukī hī na ho

khulī thī aañkh samundar kī mauj-e-ḳhvāb thā vo
kahīñ pata na thā us kā ki naqsh-e-āb thā vo

aañkh uThā.ī hī thī ki khaa.ī choT
bach ga.ī aañkh dil pe aa.ī choT

be-ḳhvābī kab chhup saktī hai kājal se bhī
jāgne vaalī aañkh meñ laalī rah jaatī hai

phir mirī aañkh ho ga.ī namnāk
phir kisī ne mizāj pūchhā hai

ham ne to apnī aañkh se dekhā nahīñ unheñ
qissa sunā hai hazrat-e-'shañkar' ke ḳhvāb kā

aañkh kyā Dāliye us gul pe jo kumhlā jaa.e
'kaifī' apnā hī ye dil bāġh-e-iram hai ham ko

ek titlī jism halkā bojh rañgoñ par gayā
khīñch kar har aañkh ne dil meñ utārā dekh le

araq-āgīñ jabīñ insāniyat kī ho ga.ī 'jumbish'
ki daur aayā hai vo sharm-o-hayā kī aañkh bhar aa.ī

kisī zulf ko sadā do kisī aañkh ko pukāro
baḌī dhuup paḌ rahī hai koī sā.ebāñ nahīñ hai

jo nigah hai chashm-e-siyāh meñ vahī barq-e-tūr hai raah meñ
tirī aañkh par jo fidā hue vo shahīd-e-rāh-e-ḳhudā hue

mirī to aañkh nam na ho sakī magar
vo mujh pe mere āñsuoñ se ro gayā