Tags-Aankh

koī khiltā huā chehrā koī ġhuncha koī phuul
aañkh sairāb huī ho to ġhazal hotī hai

āsmāñ chhīn liyā kartā hai saarā paanī
aañkh bhartī hai magar jhiil nahīñ ho paatī

vo mire ḳhvāb-e-pairahan chhū kar
uTh gayā aañkh kī chubhan chhū kar

ye tirī aañkh ke dhoke ke sivā kuchh bhī nahīñ
ek bahte hue dariyā ko kinārā na samajh

kyā faqat dekhte rahne se masā.il kī girah khultī hai
kyā faqat aañkh kī putlī meñ hai mahfūz ḳhudā.ī saarī

ye jo biphrā to Dubo.egā safīne kitne
tū ise aañkh se Tapkā huā qatra na samajh

hamārī aañkh se nīndeñ uḌāne lagtā hai
jise bhī ḳhvāb samajh kar pukārte haiñ ham

merī saarī samteñ raat ke ghere meñ
maiñ sub.hoñ kī zaḳhmī aañkh kā sapnā huuñ

lab pe duā.eñ aañkh meñ aañsū jalte haiñ
milne aur bichhaḌne vaalā koī to ho

na thā ye vahm-o-gumāñ mujh ko vo bulā.egā
achānak us ne bulāyā to aañkh bhar aa.ī

vo mujh se bhartā thā dum dostī kā lekin jab
adū se haath milāyā to aañkh bhar aa.ī

jise samajhtā thā maiñ dil-navāz jab us se
sukūn-e-qalb na paayā to aañkh bhar aa.ī

hamesha kartā thā merī jo nāz-bardārī
isī kā naaz uThāyā to aañkh bhar aa.ī

sajā ke rakhtā thā palkoñ pe jis ko maiñ aksar
nazar se us ne girāyā to aañkh bhar aa.ī

nahīñ hai shikva koī dushmanoñ se ai 'barqī'
fareb dost se khāyā to aañkh bhar aa.ī

vo hasb-e-va.ada na aayā to aañkh bhar aa.ī
mujhe tamāshā banāyā to aañkh bhar aa.ī

ruuTh jaa.e mirī āñkhoñ se bhale bīnā.ī
kaash rūThe na 'vasī' aañkh kā taarā koī dost

ba-sad aarzū jo vo aayā to ye hijāb-e-ishq se haal thā
ki hazāroñ dil meñ thiiñ hasrateñ aur uThānā aañkh muhāl thā

aaj bhī 'yāvar' hañste hañste aañkh meñ aañsū aa jaate haiñ
dard kī maujeñ ḳhuun kī lahreñ aag kā dariyā kyā nahīñ dekhā

bikhrī zulfeñ uljhī bāteñ aañkh meñ shoḳhī lab pe tabassum
khaltī kaliyāñ jhūmtī Daalī hashr sarāpā kyā nahīñ dekhā