Tags-Aankh

mat dekh tamannā kī taraf aañkh uThā kar
andhoñ kī tarah nuur ke dariyā se guzar jā

ye aarzū thī ki yak-rañg ho ke jī letā
magar vo aañkh jo shaitāñ bhī hai farishta bhī

dekhā jo maiñ ne us ko samundar kī aañkh se
gulzār aag ho ga.ī sumbul dhuāñ huā

baaġh bāzār-e-tamāshā aañkh jūyā-e-bahār
chashm-e-nargis yā tan-e-sarv-e-sahī kyā dekhnā

ḳhvāb ḳhud haqīqat haiñ aañkh khol kar dekho
kis ne kah diyā tum se ḳhvāb sach nahīñ hote

jismoñ pe ye kis kā nām-e-siyah likh dete haiñ koḌoñ ke nishāñ
haiñ taak meñ kis kī zanjīreñ ab aañkh lagā.e zindāñ meñ

dekh mahfil meñ har ik aañkh hai nam 'yazdānī'
tū ne ye chheḌ diyā aaj fasāna kaisā

jis meñ ik ashk na ho aañkh kahāñ hai vo aañkh
buuñd paanī kī na ho jis meñ vo dariyā kaisā

dil kā ātish-kada vīrān paḌā thā kab se
aañkh se bahne lagā aag kā dariyā kaisā

dekheñ kyā aañkh uThā kar ki hameñ to nāhaq
aañkh dikhlā ke vo mahbūb kahīñ baiTh rahā

jab kahā tiir tirī aañkh ne akasr maarā
chitvaneñ pher ke bole ki barābar maarā

pahle banā.e aañkh meñ ḳhvāboñ ke maqbare
phir hasratoñ ko dil meñ dabānā paḌā mujhe

ab to aañkh se itnā jaadū kar letā huuñ
jis ko chāhūñ us ko qaabū kar letā huuñ

ishq meñ ḳhvāb kā ḳhayāl kise
na lagī aañkh jab se aañkh lagī

kyuuñ aañkh mirī zālim rah rah ke phaḌaktī hai
mumkin hai vo aa jaa.eñ maiñ bhī to sañvar jā.ūñ

ab is kā chāra hī kyā ki apnī talab hī lā-intihā thī varna
vo aañkh jab bhī uThī hai dāmān-e-dard phūloñ se bhar ga.ī hai

mirī aañkh terī talāsh meñ yuuñ bhaTaktī rahtī hai rāt-din
jaise jañgaloñ meñ hiran koī ho shikāriyoñ meñ ghirā huā

tab maiñ ik aañkh thā jab to koī manzar bhī na thā
aaj tasvīr hai to naqsh-ba-dīvār huuñ maiñ

nazar nazar se milānā koī mazāq nahīñ
milā ke aañkh churānā koī mazāq nahīñ

muddat se merī aañkh meñ ik ḳhvāb hai muqīm
paanī meñ peḌ peḌ kī chhāñv meñ ret hai