Tags-Aarzoo

de deñ abhī kare jo koī ḳhūb-rū pasand
ham ko nahīñ pasand dil-e-ārzū-pasand

muntazir thī jaise ḳhud hī tinkā tinkā aarzū
ḳhār-o-ḳhas ke vāste goyā sharar paiġhām thā

ḳhizāñ ke ba.ad bahāroñ kī raah dekhī to
ye haif sad ki mirī aarzū ke paat jale

us gul kī aarzū meñ ḳhalish is qadar hai kyuuñ
kāñTe kahāñ se hasrat-o-armāñ meñ aa ga.e

chob-e-ḳhushk sahrā huuñ aur aarzū gul kī
sādgī se baḌh kar bhī hai koī himāqat kyā

aarzū meñ tirī ai nūr-e-nazar
muntazir huuñ khule haiñ man ke nayan

bas ab to yaad se hī zindagī ibārat hai
kahāñ kā va.ada ki milne kī aarzū bhī nahīñ

na sochā kāTne vaale ne itnā
harī Daalī kī thī kuchh aarzū kyā

vo aur kuchh nahīñ ik tarz guftugū kī thī
kahā ye kis ne kabhī terī aarzū kī thī

maiñ ne to kī thī dard-e-musalsal kī aarzū
tum ko gumāñ huā ki davā māñgtā huuñ maiñ

maqtal-e-ārzū hai dil 'vājid'
har tamannā lahū lahū hai yahāñ

aarzū hai maiñ rakhūñ tere qadam par gar jabīñ
tū uThāve naaz se zālim lagā Thokar jabīñ

haañ isī raste meñ hai shahr-e-nigār-e-ārzū
aap chalte jā.iye mere lahū kī dhaar par

'sāqī' hai tum ko milne kī jis gul kī aarzū
us se sar-e-mazār bhī aayā na jā.egā

vahī sā.at-e-ġham-e-ārzū jo hamesha dil meñ basī rahī
hai ḳhudā kā shukr ki 'āfrīñ' vo hamāre sar se to Tal ga.ī

na vo aarzū hai na justujū na koī tasavvur-e-rañg-o-bū
liye dil meñ dāġh-e-ġham-e-ḳhizāñ maiñ chaman se duur nikal ga.ī

jiine kī aarzū meñ jo marte haiñ saarī umr
shāyad hayāt naam isī marhale kā hai

ḳhāmosh ho raho ki sar-e-shahr-e-ārzū
uftād vo paḌī hai ki ab kyā batā.eñ ham

harf harf gūñdhe the tarz mushkbū kī thī
tum se baat karne kī kaisī aarzū kī thī

aarzū thī khīñchte ham bhī koī aks-e-hayāt
kyā kareñ ab ke lahū āñkhoñ se Tapkā hī nahīñ