Tags-Aarzoo

zabt bhī hotā hai andāz-e-junūñ meñ shāmil
aarzū shola-ba-jāñ ho ye zarūrī to nahīñ

khañDar kī tah se burīda-badan saroñ ke sivā
milā na kuchh bhī ḳhazānoñ kī aarzū kar ke

baat bhī un se kī na kisī ne aarzū dil kī rah ga.ī dil meñ
ghar meñ hī baiThī rah ga.ī laḌkī aayā na ik paiġhām munāsib

ḳhūn-e-ushshāq se jaam bharne lage dil sulagne lage daaġh jalne lage
mahfil-e-dard phir rañg par aa ga.ī phir shab-e-ārzū par nikhār aa gayā

girnī thī ham pe barq-e-tajallī na tuur par
dete haiñ baada zarf-e-qadah-ḳhvār dekh kar

kyuuñ tifl-e-ashk lipTe ai dil na āstīñ se
parvarda hai ye mere dāmān-e-ārzū kā

na hilā us ke dar se tā-mahshar
marqad-e-ārzū kī sil huuñ meñ

zindagī jā ham bhī kū-e-ārzū tak aa ga.e
is ke aage ham ko saarā rāsta ma.alūm hai

ye aarzū thī ki ham us ke saath saath chaleñ
magar vo shaḳhs to rasta badaltā jaatā hai

aarzū lutf talab ishq sarāsar nākām
mubtalā zindagi-e-dil inhīñ auhām meñ hai

ye ek maiñ ki tirī aarzū hī sab kuchh hai
vo ek tū ki mire saa.e se gurezāñ hai

use bhī hai mire jiine kī aarzū 'shahpar'
sukūn hai ki ye ash.ār be-sabab na kahe

hotī kahāñ hai dil se judā dil kī aarzū
jaatā kahāñ hai sham.a ko parvāna chhoḌ kar

aarzū hai to ḳhauf bhī kuchh hai
paak niyyat ko kyā kare koī

vo kuchh is tarah se aa.e mujhe is tarah se dekhā
mirī aarzū se kam-tar mirī taab se ziyāda

charāġh-e-anjuman-e-hairat-e-nazāra the
vo lāla-rū jinheñ ab dāġh-e-ārzū kahiye

shaikast-e-shauq ko takmīl-e-ārzū kahiye
jo tishnagī ho to paimāna-o-subū kahiye

apnī taqdīr āzmāne kī
aarzū hai kisī ko paane kī

tai kis tarah ho jāda-e-nairañg-e-ārzū
har gaam terā naqsh-e-kaf-e-pā dikhā.ī de

hasīnoñ kā pās-e-vafā ġhair-mumkin
hasīnoñ se ye aarzū kyuuñ kareñ ham