Tags-Aarzoo

aarzū ye hai ki dīvāna kahā jaa.e mujhe
naam le kar na mirā mujh ko bulāyā jaa.e

aarzū ne jis kī poroñ tak thā sahlāyā mujhe
ḳhaak āḳhir kar gayā us chāñd kā saaya mujhe

tire shahr-e-ārzū meñ yūñhī kaT ga.ī haiñ rāteñ
na junūñ kī aañkh jhapkī na ḳhirad ne lī jamāhī

tujh ko hai ham se judā.ī aarzū
mere dil meñ shauq hai dīdār kā

panāh miltī na ummīd-e-be-vafā ko kahīñ
havas-nasīb agar tark-e-ārzū karte

kabhī na parvarish-e-naḳhl-e-ārzū karte
numū se pahle jo andesha-e-numū karte

unhīñ kā hai ye dil bhī aarzū bhī
na dil merā na merī aarzū hai

huā huuñ maiñ fanā-fil-ishq 'bismil'
na ab dil hai na dil kī aarzū hai

ai ishq kyā yahī hai makāfāt-e-ārzū
apnī hī ḳhaak haath se apne uḌā.ūñ maiñ

bahāne aur bhī hote jo zindagī ke liye
ham ek baar tirī aarzū bhī kho dete

takmīl-e-ārzū se bhī hotā hai ġham kabhī
aisī duā na maañg jise bad-duā kaheñ

aarzū shab kī masāfat hai to tanhā kāTiye
din ke mahshar meñ to ho jā.eñge tanhā aur bhī

kyā chashm-e-iltifāt kā matlab samajh gayā
kyuuñ tark-e-ārzū kī qasam khā rahā huuñ maiñ

ab is qadar bhī to be-ābrū na samjhā jaa.e
ki aarzū ko mirī aarzū na samjhā jaa.e

javānī jā chukī 'mahrūm' zauq-e-ārzū kaisā
tumhāre be-niyāz-e-mudda.ā hone kā vaqt aayā

mīnū-savād tujh se haiñ vādiyāñ hamārī
aur kisht-e-ārzū hai rashk-e-jināñ hamārī

jo un kī ḳhū thī so un kī ḳhū hai jo guftugū thī so guftugū hai
phir un pe miTne kī aarzū hai jo har tarah se miTā chuke the

ḳhaak bhī lutf-e-zindagī na rahā
aarzū jī meñ ho vo jī na rahā

hāmid kahāñ ki dauḌ ke jā.ūñ ḳhabar ko maiñ
kis aarzū pe qat.a karūñ is safar ko maiñ

kitne sahrā utar ga.e mujh meñ
ik subū aarzū kā bharne tak