Tags-Aarzoo

maiñ apne jism ke sāhil pe terī aarzū likkhūñ
yaqīñ ho gar ki paanī ret se guzrā nahīñ kartā

pī kar lahū siyāh huī kisht-e-ārzū
kyā dekhte ki ḳhaak kā da.avā bahār thā

nashtar se aarzū ke dil-e-zindagī figār
ḳhud zindagī vajūd ke siine meñ nok-e-ḳhār

ab us kī diid mohabbat nahīñ zarūrat hai
ki us se mil ke bichhaḌne kī aarzū hai bahut

de ga.ī kitnī bahāreñ ek fasl-e-ārzū
rañg-o-bū ko mausamoñ kā ḳhūñ-bahā kah lījiye

lagā rahā hai hinā kaun tere hāthoñ meñ
rulā rahī hai mujhe ḳhuun aarzū terī

kabhī hai qasd haram kā kabhī hai azm-e-kunisht
kashāñ kashāñ liye phirtī hai aarzū terī

na chaak kar dil-e-be-tāb ko mire zālim
nikal ke ho kahīñ rusvā na aarzū terī

vo tīrgī hai rah-e-butāñ meñ charāġh-e-ruḳh hai na sham-e-vāda
kiran koī aarzū kī laao ki sab dar-o-bām bujh ga.e haiñ

'muztar' har aa.ine meñ thā aks-e-bahār bas
maiñ apnī aarzū se bahut pā.emāl thā

vaqt kī mehrāb meñ ik sham-e-nau raushan kareñ
rāzdān-e-ārzū ham vāris-e-āfāt haiñ

mujh ko 'āzar' ik fareb-e-ārzū
ḳhūb-sūrat zindagānī de gayā

vo aarzū na rahī aur vo mudda.ā na rahā
hamāre aap ke hargiz vo mājrā na rahā

rahīn-e-yās raheñ ahl-e-ārzū kab tak
kabhī to aap kā darbār aam ho jaa.e

ek us ke dam se har mausam huā rashk-e-bahār
ek shāḳh-e-ārzū ko be-samar us ne kiyā

charāġh-e-ārzū hai muntazir dahlīz par merī
vo duurī ke dhuñdlakoñ meñ bahut lāchār hai phir bhī

dil meñ 'nāsik' rah ga.ī haiñ aarzū kī do laveñ
ek ḳhush aadat sī laḌkī aur ik chhoTā sā ghar

mirī apnī aur us kī aarzū meñ farq ye thā
mujhe bas vo use saarā zamāna chāhiye thā

kabhī to ehtimām-e-ārzū bhī thā zarūrī
koī to ziist karne kā bahānā chāhiye thā

uThānā chāhiye thī raakh shahr-e-ārzū kī
phir is ke ba.ad ik tūfān uThānā chāhiye thā