Tags-Aarzoo

ye terī aarzū terī tamannā
bhalā kyuuñ vaj.h-e-ḳhvārī ho ga.ī hai

le naam aarzū kā to dil ko nikāl leñ
'momin' na hoñ jo rabt rakheñ bid.atī se ham

shab-e-firāq meñ ye dil se guftugū kyā hai
marī umiid haiñ vo un kī aarzū kyā hai

'jāmī' pe kyā banegī ḳhudā jaane hashr meñ
jannat kī aarzū hai gunāhoñ se pyaar bhī

har-chand be-dareġh bahā ḳhūn-e-ārzū
lekin huā hai dāman-e-dil lāla-zār bhī

ḳhat-e-qismat miTāte ho magar itnā samajh lenā
ye harf-e-ārzū hāthoñ kī rañgat le ke uTTheñge

tamām raat maiñ zulmāt-e-intizār meñ thā
tamām raat thā mahtāb-e-ārzū raushan

koī dil kī niklī na aarzū huā ranj-o-ġham se jigar lahū
phire ḳhaak chhānte kū-ba-kū na to sabr hai na qarār hai

ek tamannā ho to yaar se kahiye 'nazīr'
dil hai pur-az-ārzū kījiye kyā kyā talab

va.ada hī va.ada thā na vo aa.e na ā.eñge
ai chashm-e-ārzū hai tujhe intizār kyuuñ

aarzū ke nihāl ko 'shāhid'
āñsuoñ kī namī hī kaafī hai

de ga.ī mustaqil ḳhalish dil ko
aarzū pā.emāl hote hue

kyā shahr-e-ārzū thā basā aur ujaḌ gayā
ab sar-kashīda phirtī haiñ purvā.iyāñ tamām

vo vasl ho ki khule aa.ine pe aks-e-jamāl
ye aarzū hai magar baat iḳhtiyār kī hai

shab thī be-ḳhvāb ik aarzū der tak
shahr-e-dil meñ phirī kū-ba-kū der tak

ye terī aarzū meñ baḌhī vus.at-e-nazar
duniyā hai sab mirī nigah-e-intizār meñ

kuchh maqsad-e-hayāt na ḳhauf-e-ḳhudā use
jannat kī aarzū hai na mushtāq-e-hūr hai

har ghaḌī dil ko aarzū hai yahī
jo abhī tak nahīñ huā jānāñ

guzārish hai ki ai ma.abūd mujh ko zabt-e-ġham de de
na kar de faash rāz-e-ārzū ko bekasī apnī

huī bāliġh mirī tanhā.ī āḳhir
kisī kī aarzū karne lagī hai