Tags-Aarzoo

nigāh o dil se ab tafsīr-o-sharh-e-āzrū hogī
zabān o lab se tark-e-iltijā karne kā vaqt aayā

sab pe khulne kī hameñ hī aarzū shāyad na thī
ek do hoñge ki ham jin par faqīrāna khule

na fikr koī na justujū hai na ḳhvāb koī na aarzū hai
ye shaḳhs to kab kā mar chukā hai to be-kafan phir ye laash kyuuñ hai

koī ābshār na āb-e-jū kisī aur lahar kī aarzū
mirī pyaas bujhne kā aur koī Thikānā ho kahīñ yuuñ na ho

kyā ab kisī kī aarzū yā justujū kareñ
ab ḳhud se hī savāl kareñ guftugū kareñ

zindān-e-ārzū meñ nazar be-basar rahī
dīvār dar huī to kiran kā guzar huā

agarche vo bhī na the hasb-e-ārzū lekin
vo din kaTe jo tirī aarzū meñ achchhe the

phir DhūñDhtā hai dil ḳhalish-e-ḳhār-e-ārzū
pachhtā rahā huuñ dil se ye kāñTā nikāl ke

ummīd-o-yās-o-hasrat-o-armān-o-ārzū
kyā kyā na rāh-e-ġham meñ mujhe ham-safar mile

ġham-e-zindagī tirī raah meñ shab-e-ārzū tirī chaah meñ
jo ujaḌ gayā vo basā nahīñ jo bichhaḌ gayā vo milā nahīñ

sahrā ho reg-zār ho yā shahr-e-ārzū
milte haiñ duur duur sarāboñ ke silsile

kyā vo ḳhvāhish ki jise dil bhī samajhtā ho haqīr
aarzū vo hai jo siine meñ rahe naaz ke saath

kyā kyā ajal ne jaan churā.ī tamām shab
koī bhī aarzū na bar aa.ī tamām shab

terī aarzū kyā hai kyā nahīñ samajhtā maiñ
dekh apnī ḳhvāhish ko aur mat chhupā mujh se

ba-pās-e-ehtiyāt-e-ārzū ye bār-hā huā
nikal gayā qarīb se vo haal pūchhtā huā

ye aarzū bhī baḌī chiiz hai magar hamdam
visāl-e-yār faqat aarzū kī baat nahīñ

hazrat-e-dil ko ḳhudā rakkhe vahī haiñ shorisheñ
dard-e-mahrūmī bhī soz-e-ārzūmandī bhī hai

aarzū kasmasā.e phirtī hai
koī sūrat nahīñ ki tujh se kaheñ

miTte miTte miT ga.ī jān-e-vafā kī aarzū
aate aate be-qarārī ko qarār aa hī gayā

ma.alūm hai na hogī puurī ye aarzū bhī
phir dil ko be-sabab kyuuñ bīmār kar rahā huuñ