Tags-Aarzoo

koī hāsil na thā aarzū kā magar sāneha ye hai ab aarzū bhī nahīñ
vaqt kī is masāfat meñ be-ārzū tum kahāñ jāoge ham kahāñ jā.eñge

aarzū ko ruuh meñ ġham ban ke rahnā aa gayā
sahte sahte ham ko āḳhir ranj sahnā aa gayā

aarzū la.al-o-gohar kī kis liye kartā 'bashīr'
harf-o-ma.anī kā ḳhazīna kyā use kaafī na thā

aarzū hai mire 'tābāñ' ko bhī ab ai qātil
ki bar aa.e tire hāthoñ se mirā kaam kahīñ

jahān-e-ārzū meñ husn kā bhī naam ho jaa.e
maza aa jaa.e vo gul bhī agar ho 'ḳhār' ke sadqe

aarzū phir hai dar-pa-e-tadbīr
sa.i-e-nākām kī duhā.ī hai

na koī baat na maqsad na aarzū na savāl
bas ek ġhalġhala-e-gīr-o-dār raah meñ hai

sharminda apnī jeb ko kartā nahīñ huuñ maiñ
bāzār-e-ārzū se guzartā nahīñ huuñ maiñ

sabā kī ḳhāk-navardī subū kī vīrānī
tumhāre baad huī aarzū kī vīrānī

dil meñ jaagī hai kaisī tamannā na.ī ḳhud maiñ hairān huuñ
ik na.ī aarzū ne mujhe chhū liyā raat ke is pahar

mujhe ye Dar hai tirī aarzū na miT jaa.e
bahut dinoñ se tabī.at mirī udaas nahīñ

nākām zindagī ho ki nākām ishq ho
jiine kī aarzū to mirī jaañ sabhī meñ hai

na koī phuul hī rakhā na aarzū na charāġh
tamām ghar ko bayābān kar diyā maiñ ne

tire ḳhayāl tirī aarzū se duur rahe
navāb ho ke bhī ham lucknow se duur rahe

terā ġham terī aarzū kab tak
mujh se rūThā rahegā tū kab tak

jo shikast-e-ārzū par muskurā saktā nahīñ
zindagī kī azmatoñ kā raaz pā saktā nahīñ

na is se milne kī hai tamannā na us ko paane kī aarzū hai
diyā mohabbat kā jal rahā hai jo jī meñ aa.e kare havā kā

vo din bhī kyā the dil meñ tamannā na thī koī
takmīl-e-ārzū ke liye dar-ba-dar na the

vo ḳhvāb thā ki ji.eñ dil kī aarzū ke liye
ye vāqi.a hai ki marne kā hausla na rahā

tamām umr na milne kā hausla hī sahī
tum apne dil meñ koī aarzū to rakhte ho