Tags-Aarzoo

nikalnā aarzū kā dil se ma.alūm
hujūm-e-yās meñ rasta mile kyā

mirī aarzū ke charāġh par koī tabsira bhī kare to kyā
kabhī jal uThā sar-e-shām se kabhī bujh gayā sar-e-shām se

adam kā thā safar jab aur kuchh tosha na haath aayā
bahut sī aarzū chalte chalāte saath le lī hai

sabr o qarār le ke diyā dāġh-e-ārzū
ābād tum ne dil ko kiyā mujh ko luuT kar

ik aarzū ke ta.āqub meñ yuuñ huā hai 'nabīl'
havā ne ret kī palkoñ pe lā biThāyā mujhe

haram ke dil meñ soz-e-ārzū paidā nahīñ hotā
ki paidā.ī tirī ab tak hijāb-āmez hai saaqī

ai aarzū shahīd-e-vafā ḳhūñ-bahā na maañg
juz bahr-e-dast-o-bāzu-e-qātil duā na maañg

mujh ko dekho aur merī aarzū
ik hasīñ achchhe se achchhā chāhiye

pūchhī hai dost ban ke mire dil kī aarzū
us ne zabān de ke mirā mudda.ā liyā

harīm-ka.aba se bhī mohtaram hai
vo dil jis meñ ki terī aarzū ho

zabāñ sākit ho qat-e-guftugū ho
nazar hī se bayān-e-ārzū ho

ye aarzū thī use aa.ina banāte ham
aur ā.īne kī hifāzat meñ TuuT jaate ham

halāk-anjām takmīl-e-tamannā
baqā-e-ārzū hī zindagī hai

kisī tarah se miTā de ye naqsh-hā-e-yaqīñ
kisī tarah se bhī is shahr-e-ārzū se nikal

aarzū ek alamnāk kahānī hī sahī
phir se ik baar sunā do ki maiñ zinda huuñ abhī

ek nannhī sī aarzū ke liye
ḳhvāb meñ ghar banā ke dekho to

yuuñ aaj be-qarār hai duniyā-e-ārzū
jis tarah tilmilā.e koī dil dukhā huā

jhūlā jhulā rahī thī mujhe dil kī aarzū
sab jāgte the aur meñ sotā chalā gayā

har nafas-e-ārzū jo ba-unvān-e-hosh thā
jaise koī sharāb se dhotā chalā gayā

abhī muskurā rahī thiiñ mirī aarzū kī kaliyāñ
mujhe le chalā muqaddar sū-e-dām āshiyāñ se