Tags-Aadmi

tū ḳhāna-zād-e-zulf ko āzād kyuuñ kare
maiñ to tirā ġhulām huuñ maiñ aadmī nahīñ

ek duuje se uktā ga.e aadmī
in se uktā.egā kab ḳhudā dekhiye

kyā aadmī kī ḳhaak ko rauñdūñ maiñ rahm-dil
rotā hai pā.emāli-e-mardum-giyāh par

qaid-e-hayāt o band-e-ġham asl meñ donoñ ek haiñ
maut se pahle aadmī ġham se najāt paa.e kyuuñ

baḌī chiiz daulat-o-jāh hai baḌī vus.ateñ haiñ nasīb use
magar ahl-e-daulat-o-jāh meñ kahīñ aadmī kā guzar bhī hai

shanāḳht jis se zamāne meñ aadmī kī hai
ye iltijā hai ki tū mujh ko vo ḳhudī denā

mirā ġhazāl ki vahshat thī jis ko saa.e se
lipaT gayā mire siine se aadmī kī tarah

ab use māhaul jis qālib meñ chāhe Dhaal de
fitratan to aadmī ik paikar-e-mafhūm hai

hasb-e-nairañg-e-jahāñ dil shaad yā maġhmūm hai
aadmī jazbāt kā hākim nahīñ mahkūm hai

sab se pur-amn vāqi.a ye hai
aadmī aadmī ko bhuul gayā

ḳhūn-e-jigar kare hai dil ko lahū kare hai
ye daur aadmī ko yuuñ surḳh-rū kare hai

tirī nigāh-e-karam se ajab nahīñ vāris
'riyāz' sā sag-e-duniyā bhī aadmī ho jaa.e

rāste jab band hote haiñ duāoñ ke liye
aadmī laḌtā hai jab jhūTe ḳhudāoñ ke liye

jahāñ meñ hai ki kamīñ-gāh meñ ḳhudā jaane
ab is qadar bhī subuk aadmī na ban jaa.e

aadmī puurā huā to devtā ho jā.egā
ye zarūrī hai ki us meñ kuchh kamī baaqī rahe

ye aadmī haiñ ki saa.e haiñ ādamiyyat ke
guzar huā hai mirā kis ujaaḌ bastī meñ

ham faqīroñ kī sūratoñ pe na jā
ḳhidmat-e-ādmī ke mujrim haiñ

ādamiyat ke evaz us ne ḳharīdā hai libās
aadmī thā aadmī jab ahd-e-uryānī meñ thā

jale makānoñ meñ bhuut baiThe baḌī matānat se sochte haiñ
ki jañgaloñ se nikal kar aane kī kyā zarūrat thī aadmī ko