Tags-Aadmi

jis qadar bhartā rahā ūñchī uḌaan
aadmī girtā gayā me.aar meñ

jhuuT bolā hai to qaa.em bhī raho us par 'zafar'
aadmī ko sāhab-e-kirdār honā chāhiye

guzar kar aadmī rāh-e-musībat se sañvartā hai
qamar kā nuur shab kī zulmatoñ meñ hī nikhartā hai

be-yaqīnī kā ye aalam ho gayā hai āj-kal
aadmī das das jagah hai aasrā bāñdhe hue

chāñdnī raat ne ehsās dilāyā hai 'malāl'
aadmī kitne sarāboñ meñ ghirā hotā hai

aadmī vaqf-e-kār-e-duniyā hai
mehmāñ mezbān hai goyā

tū ḳhudā jis ko banāne par ba-zid hai nā-samajh
vo faqat ik aadmī hai aadmī kī baat kar

bañgle meñ jā ke ḳhaak rahe koī 'mus.hafī'
kar deñ haiñ aadmī kā yahāñ jī uchāT saañp

sūrat-e-hāl badal jaatī hai ik lamhe meñ
aadmī apne irādoñ meñ aTal kaise ho

ye vaqt kā ḳhaas aadmī thā
be-vaqt jo ghar ko jā rahā hai

nām-levā tumhārā hai 'tarzī'
aadmī kī tarah milo pyāre

kamtar us ko na kahiye 'yazdānī'
aadmī ḳhud hai jān-e-do-ālam

ḳhudā muaaf kare zindagī banāte haiñ
mire gunāh mujhe aadmī banāte haiñ

apnī maujūdgī se thā maiñ be-ḳhabar dekhtā kyā huuñ aise meñ yak-dam idhar
qat.a kartī huī shab ke pahlū meñ ik aadmī TūTtā aur bikhartā huā

agar aadmī ko na ho mashġhala kuchh
bahisht-e-barīñ meñ ho dushvār rahnā

bandoñ ke silsile meñ bahut tū ne kah liyā
allāh apne baare meñ kuchh aadmī se pūchh

ta.ajjub un ko hai kyuuñ merī ḳhud-kalāmī par
har aadmī kā koī rāz-dāñ zarūrī hai

kyā zamīñ kyā āsmāñ kyā dasht-o-dariyā
aadmī kī bartarī chāroñ taraf hai

apne hī a.amāl par pachhtā ke ab
ro rahā hai ro rahā hai aadmī