Tags-Aadmi

is aadmī ne bahut qahqahe lagā.e haiñ
ye aadmī jo laraztā hai muskurāte hue

dil to jalā kiyā hai vo sho.ala sā aadmī
ab kis ko chhū ke haath bhī apnā jalā.ūñ maiñ

kyuuñ na simran paḌhe bashar ai 'shād'
aadmī haDDiyoñ kā maalā hai

maiñ ne ek aadmī ke māthe par
ġhurūr-e-sajādgī ke gulāb dekhe

sar chaḌh ke boltā hai har ik aadmī ke vo
qabze meñ jis ke aaj kā aḳhbār ho gayā

is daur kā har aadmī ayyār ho gayā
apnā zamīr bech ke sardār ho gayā

usī ke saa.e meñ sustā.e us ke bairī bhī
us aadmī meñ daraḳhtoñ sī burdbārī thī

vatan kī ḳhidmat-e-be-laus hai har shaḳhs par lāzim
yahī vo kaam hai jo aadmī ke kaam aatā hai

misl-e-habāb dam meñ fanā ho jo aadmī
paanī kā bulbula na huā aur kyā huā

vo zahr hai fazāoñ meñ ki aadmī kī baat kyā
havā kā saañs lenā bhī muhāl kar diyā gayā

nafs-e-ammāra sā rakhtā hai ye sarkash dushman
aadmī ke liye ġhāfil nahīñ rahnā behtar

umr ke saath ajiib sā ban jaatā hai aadmī
hālat dekh ke dukh huā aaj us parī-jamāl kī

badal ke rakh deñge ye tasavvur ki aadmī kā vaqār kyā hai
ḳhalā meñ vo chāñd nāchtā hai zamāñ makāñ kā hisār kyā hai

gharoñ pe naam the nāmoñ ke saath ohde the
bahut talāsh kiyā koī aadmī na milā

aadmī ko chāhiye taufīq chalne kī faqat
kuchh nahīñ to guzre vaqtoñ kā dhuāñ le kar chale

roz jo martā hai is ko aadmī likkho kabhī
tīrgī ke baab meñ bhī raushnī likkho kabhī

kūza-gar ne jaane kyuuñ aadmī banāyā hai
us ko sab khilaunoñ se tum zarā alag rakhnā

abas hai ibādat abas is kā taqvā
agar ādamiyat nahīñ aadmī meñ

girjā meñ mandiroñ meñ azānoñ meñ baT gayā
hote hī sub.h aadmī ḳhānoñ meñ baT gayā

na koī ḳhvāb na koī ḳhalish na koī ḳhumār
ye aadmī to adhūrā dikhā.ī paḌtā hai