Tags-Aadmi

chalte haiñ bach ke shaiḳh o barhaman ke saa.e se
apnā yahī amal hai bure aadmī ke saath

har taraf ik jañg kā māhaul hai 'āzam' yahāñ
aadmī ab ghar ke bhī andar salāmat hai kahāñ

burā bure ke alāva bhalā bhī hotā hai
har aadmī meñ koī dūsrā bhī hotā hai

jab us ke sāmne sūraj havā nadī kyā hai
ham aadmī haiñ hamārī bisāt hī kyā hai

bazm-e-tarab meñ dosto dekh rahā huuñ maiñ yahī
raqs meñ aadmī to haiñ raqs meñ zindagī nahīñ

nasb har shaḳhs nazar aatā hai chaurāhe par
aadmī bhuul gayā bhiiḌ meñ rasta apnā

aap 'mahshar' se mil ke dekheñ to
aadmī vo bhī burdbār sā hai

bahut dinoñ ba.ad paa.ī fursat to maiñ ne ḳhud ko palaT ke dekhā
magar maiñ pahchāntā thā jis ko vo aadmī ab kahīñ nahīñ hai

farq mushkil hai bahut dasht ke bāshindoñ meñ
aadmī baiThā hai aisā ki shajar baiThā hai

ḳhushiyāñ thiiñ bevafā na rahīñ zindagī ke saath
ġham bā-vafā the chalte rahe aadmī ke saath

saḌak pe so.e hue aadmī ko sone do
vo ḳhvāb meñ to pahuñch jā.egā basere tak

thā kabhī ilm aadmī dil aadmī pyaar aadmī
āj-kal zar aadmī qasr aadmī car aadmī

dānish-o-hikmat kī saarī raushnī ke bāvajūd
kam hī miltā hai zamāne meñ kam-āzār aadmī

umr bhar sahrā-navardī kī magar shādī na kī
qais dīvāna bhī thā kitnā samajhdār aadmī

zindagī nīche kahīñ muñh dekhtī hī rah ga.ī
kitnā ūñchā le gayā jiine kā me.aar aadmī

patlī gardan patle abrū patle lab patlī kamar
jitnā bīmār aadmī itnā trahdār aadmī

pahle kashtī Duub jaatī thī nazar ke sāmne
ab giregā bahr-e-oqiyānnūs ke baar aadmī

kulbulātī bastiyāñ mushkil se do-chār aadmī
kitnā kamyāb aadmī hai kitnā bisyār aadmī

dil raheñ haiñ sauma-e-dastār rehn-e-mai-kada
thā zamīr 'ja.afarī' bhī ik mazedār aadmī

darindagī kā musalsal mahāz hai qaa.em
ye dekhne ke liye aadmī kahāñ tak hai