Tags-Aadmi

devtā banñe kī hasrat meñ muallaq ho ga.e
ab zarā nīche utariye aadmī ban jā.iye

baḌī ḳhūbiyāñ haiñ baḌe aadmī meñ
ġharīboñ kī kaTtī hai bechārgī meñ

mire maulā sameTe kaun kis ko
yahāñ har aadmī bikhrā huā hai

aadmī ke paas sab kuchh hai magar
ek tanhā ādamiyyat hī nahīñ

dal badal jaa.e ghar badal jaa.e
aadmī kā koī patā hai kyā

aadmī dil meñ utar jaa.e to zinda hai magar
aadmī dil se utar jaa.e to mar jaatā hai

aane vaale jaane vaale har zamāne ke liye
aadmī mazdūr hai rāheñ banāne ke liye

kaḌā rakhe aadmī jo dil ko to jhel le har kaḌī ko āsāñ
bañdhī huī ho jo apnī himmat to kaam koī muhāl kyā hai

kyā labālab roz o shab the aur kyā vahshī thā maiñ
zindagī se duur ho kar aadmī bantā gayā

is ehtimām-e-jashn-e-mashiyyat ko kyā kahūñ
paidā kiyā hai dard dil-e-ādmī ke saath

ye shahr bhedoñ bharā yahāñ aadmī mileñge
magar kisī ke bhī dosh par sar nahīñ milegā

mat rakh tazād-e-zāhir-o-bātin ki aadmī
tujh ko tire amal se parakhnā na bhuul jaa.e

māshūq ke kahe kā burā mānte ho 'dāġh'
bardāsht aadmī kī tabī.at meñ chāhiye

aadmī ko davām ho ki na ho
ādamiyat davām hai yaaro

fāsle raaz darmiyāñ haiñ magar
aadmī phir bhī hai ḳhudā ke qarīb

pattharoñ ke des meñ shīshe kā hai apnā vaqār
devtā apnī jagah aur aadmī apnī jagah

aadmī ik tazād-e-bāham hai
kabhī jannat kabhī jahannam hai

ye duniyā jahāñ aadmī kuchh nahīñ hai
vafā kuchh nahīñ dostī kuchh nahīñ hai

ujālā ilm kā phailā to hai chāroñ taraf yaaro
basīrat aadmī kī kuchh magar kam hotī jaatī hai

tabāhī kī ghaḌī shāyad zamāne par nahīñ aa.ī
abhī apne kiye par aadmī sharmā hī jaatā hai