Tags-Aagahi

bhāge zarūr arsa-e-tañg-e-ḳhudī se ham
nikle magar na dā.ira-e-āgahī se ham

apnī hastī hī se ho jo kuchh ho
āgahī gar nahīñ ġhaflat hī sahī

junūñ kā ek taqāzā thā sirf sar-mastī
kitāb jhoñk dī ham āgahī ko bhuul ga.e

kyā ho sake hisāb ki jab āgahī kahe
ab tak to rā.egānī meñ saarā safar kiyā

ye hai kamāl-e-jahl ki me.arāj-e-āgahī
har lamha justujū hai kuchh apnī ḳhabar mile

āgahī aur ka.ī naqsh banā saktī hai
tum jo insān ko DhūñDo to ḳhudā mil jaa.e

mujh par khulā jo bāb-e-rumūz-e-ḳhud-āgahī
maiñ ḳhud se ho ke zehn-e-ḳhudā tak pahuñch gayā

jab āgahī mujhe gumrāh kartī hai 'mohsin'
junūñ bahāl bhī us kī taraf se hotā hai

āgahī se milī hai tanhā.ī
aa mirī jaan mujh ko dhoka de

ye ek pal jo hai maj.hūl shaḳhs kī sūrat
mizāj-e-āgahi-e-māh-o-sāl pūchhegā

tamāzatoñ meñ bas ik ḳhushk peḌ kī chhāñv
hai jis pe naaz bahut vo bhī āgahī kyā hai

ham se dīvānoñ ko asrī āgahī Dastī rahī
khokhlī tahzīb kī farzāngī Dastī rahī

mujh ko merī āgahī āñkhoñ se ojhal kar ga.ī
us ne jo kuchh lauh-e-jāñ par likh diyā raushan huā

shohrat ke āsamān par uḌne lagā thā maiñ
raste meñ āgahī kā ḳhalā mil gayā mujhe

vo but bhī dushman-e-īmān-o-āgahī thā magar
use jo dekhā to ham ne ḳhudā ko maan liyā

jo basīr ho vo nazar bhī de mujhe āgahī kā hunar bhī de
magar ab tū merī ḳhabar bhī de ki mujhe ḳhud apnā pata nahīñ

jo milī nahīñ mujhe āgahī hai mirī nigāh se ajnabī
ho rag-e-gulū se qarīb bhī to yahī kaheñge milā nahīñ

tabāhiyoñ ke liye musta.id haiñ ahl-e-jahāñ
ye āgahī kahīñ tauhīn-e-āgahī to nahīñ

hameñ kyā kaam aql-o-āgahī se
hamāre beach farzāne bahut haiñ

is kār-e-āgahī ko junūñ kah rahe haiñ log
mahfūz kar rahe haiñ fazā meñ sadā.eñ ham