Tags-Aagahi

-āsāñ nahīñ hai kashmakash-e-zāt kā safar
hai āgahī ke ba.ad ġham-e-āgahī bahut

na.e insān kā jab daur-e-ḳhud-nā-āgahī badlā
rumūz-e-be-ḳhudī badle taqāzā-e-ḳhudī badlā

shoḳhī-o-bazla-sanjī doshīzgī vahī hai
ma.asūmiyat ga.ī bas ehsās-e-āgahī se

jaise jaise āgahī baḌhtī ga.ī vaise 'zahīr'
zehn o dil ik dūsre se munfasil hote ga.e

sahn-e-makāñ meñ shal hai dast-e-duā-e-āgahī
dil meñ hai shauq-e-be-hisāb had kī lakīr ke sabab

kisī ke dard ko maiñ jāntā bhalā kyuuñ kar
ḳhud apne dard se jab mujh ko āgahī na huī

junūñ baġhair kabhī āgahī nahīñ hotī
jale na sham.a to kuchh raushnī nahīñ hotī

koī mānūs chaap aa.e surāġh-e-āgahī le kar
maiñ apnī ḳhvāhishoñ ke ḳhāna-e-be-dar meñ rahtā huuñ

jaan par ban ga.ī ki aalam par
jaan levā hai āgahī kā dukh

jab se dekhā hai un ko be-parda
naḳhvat-e-āgahī nahīñ jaatī

maiñ chashm-e-pur-nam kī mish.aloñ se charāġh-e-fardā jalā rahā huuñ
ki naqsh-e-irfān-o-āgahī bhī 'zafar' mirī ḳhaak meñ milegā

aaj bhī dil ko hai mire daulat-e-āgahī nasīb
aaj bhī hai nazar mirī arz-o-samāñ kī rāz-dāñ

jhaḌtī nahīñ gard āgahī kī
dāman ko jhaTak rahā huuñ kab se

kis ne mirī nigāh se parde uThā diye
ik rañj-e-āgahī ki idhar kaun le gayā

sazā-e-maut se bad-tar hai āgahī kī sazā
shu.ūr-e-harf ke zindāñ meñ jal bujhe ham log

āgahī ke hamārī āñkhoñ par
jis qadar haiñ azaab taaza haiñ

āgahī bhī na kar sakī puurā
jitnā nuqsān āgahī se huā

pinhāñ thā laġhzishoñ meñ bhī ehsās-e-āgahī
maiñ kyā sambhal gayā ki zamāna sambhal gayā

zauq-e-khud-āgahī ne ai 'qābil'
kitne but-ḳhāne toḌ Daale haiñ

samajh kar sañg-e-rāh-e-shauq Thukrātā huuñ manzil ko
kamāl-e-āgahī kahiye ise yā gumrahī kahiye