Tags-Aagahi

tujhe āgahī kī nahīñ ḳhabar mirī gumrahī pe na tanz kar
are vaqt vaqt kī baat hai yahī aib rashk-e-hunar bhī hai

jaane kise nasīb ho 'bebāk' āgahī
nāqid jadīd daur kā taḳhmīn-o-zan meñ hai

dil ke lahū se ruuh kī hotī hai parvarish
me.arāj āgahī kī vafūr-e-mehan meñ hai

kabhī junūñ to kabhī āgahī kī qaid meñ huuñ
maiñ apne zehn kī āvārgī kī qaid meñ huuñ

koī mānūs chaap aa.e surāġh-e-āgahī le kar
maiñ apnī ḳhvāhishoñ ke ḳhāna-e-be-dar meñ rahtā huuñ

is dasht-e-pur-sarāb meñ bhaTkūñ kahāñ kahāñ
zinjīr-e-āgahī mire pairoñ meñ Daal de

kab tak rahegā vahshī-e-ehsās-o-āgahī
nā-sāzgār āb-o-havā se alag-thalag

kis ko mire haal se thī āgahī
nāla-e-shab sab ko ḳhabar kar gayā

'tanvīr' āgahī deñ kahāñ tak hayāt ko
be-nūr ho chale haiñ diye e'tibār ke

agar shu.ūr na ho to bahisht hai duniyā
baḌe azaab meñ guzrī hai āgahī ke saath

jo buuñd buuñd jalātī hai tan badan merā
vo āgahī kī tamannā mire vajūd meñ hai

kaif-e-ḳhud-āgahī bhī hai ālam-e-be-ḳhudī bhī hai
shauq-e-supurdagī bhī hai aaj nigāh-e-nāz meñ

laayā hai ishq ne mujhe aise maqām par
ḳhud-āgahī rahī na ḳhudā-āgahī rahī

āgahī roz Darātī rahī manzil se magar
hausla paañv kī zanjīr meñ rakkhā gayā thā

agar hai terī nigāh bāliġh agar hai terā shu.ūr puḳhta
to jehl kī zulmatoñ hī se tujh ko mash.al-e-āgahī malegī

jitnī ziyāda hai kam hai utnī hī
ye chalan āgahī se miltā hai

'badr' jab āgahī se miltā hai
ik diyā raushnī se miltā hai

be-mai kise hai tāqat-e-āshob-e-āgahī
khīñchā hai ijz-e-hausla ne ḳhat ayāġh kā

ba-hazār dānish-o-āgahī mirī maslahat hai abhī yahī
maiñ asīr-e-zulmat-e-shab sahī mirī dastaras meñ sahar bhī hai

āgahī meñ ik ḳhalā maujūd hai
is kā matlab hai ḳhudā maujūd hai