Tags-Deedar

yaar ik lazzat-e-dīdār se aage na ga.e
ya.anī zulf-o-lab-o-ruḳhsār se aage na ga.e

kyā soch ke insān se sharmā.e hue haiñ
dete nahīñ dīdār sar-e-ām farishte

mahv-e-dīdār hue jaate haiñ rah-rau saare
ik tamāsha huā goyā ruḳh-e-dilbar na huā

vo tālib-e-dīdār ke paas aa.eñ magar kyā
hairat kā ye aalam hai ki kuubā ga.iiñ āñkheñ

hasrat-e-dīdār aisī faisla-kun thī mirī
lamhe bhar meñ ho gayā ik umr sā lambā safar

ham kahāñ ai dil kahāñ dīdār-e-yār
ho gayā terī badaulat dekhnā

kāsa-e-chashm le ke juuñ nargis
ham ne dīdār kī gadā.ī kī

aañkh jhapkī thī tasavvur bañdh chukā thā yaar kā
chauñkte hī hasrat-e-dīdār kā daftar khulā

apne dīdār kī hasrat meñ tū mujh ko sarāpā dil kar de
har qatra-e-dil ko qais banā har zarre ko mahmil kar de

mātam-e-dīd hai dīdār kā ḳhvāhāñ honā
jis qadar dekhnā utnā hī pashemāñ honā

qayāmat meñ dīdār kā kab yaqīñ hai
yūñhī lan-tarānī sunā kījiyegā

kyuuñ āshnā-e-chashm ho dīdār-e-husn kā
ye girya-āzmā.ī to aadat hai aur bas

maiñ baaġh meñ huuñ tālib-e-dīdār kisī kā
gul par hai nazar dhyān meñ ruḳhsār kisī kā

tire bīmār-e-ġham ko hai to bas hai
faqat ik hasrat-e-dīdār baaqī

mushtāq jam.a haiñ pa.e-dīdār saikḌoñ
dar par haiñ saikḌoñ pas-e-dīvār saikḌoñ

āḳhir mirī turbat se ugī hai gul-e-nargis
kyā bād-e-fanā hasrat-e-dīdār nikālī

tirā shauq-e-dīdār paidā huā hai
phir is dil ko āzār paidā huā hai

duur se bhī na huā yaar kā dīdār nasīb
ḳhair bāteñ na huī thiiñ to ishāre hote

ham ki mahrūm haiñ dīdār-e-ḳhudāvandī se
chashm-e-zāhir to ba-har-sū nigarāñ rakhte haiñ

kis martaba thī hasrat-e-dīdār mire saath
jo phuul mirī ḳhaak se niklā nigrāñ thā