Tags-Dhoka

hasrat-e-pā.emāl meñ gum haiñ
ham fareb-e-ḳhayāl meñ gum haiñ

miltā to hai ḳhushī kī haqīqat kā kuchh surāġh
lekin nazar-fareb ishāroñ ke shahr meñ

fareb umr do roza kā khaa.e baiThe haiñ
batā.eñ kyā ki jo sadma uThā.e baiThe haiñ

bahār-e-nau ye haqīqat hai yā fareb-e-nigāh
libās-e-gul nazar aatā hai taar taar mujhe

haqīqat-e-fareb-e-husn aalam āshkār kī
ye ibtidā-e-fatah hai junūn-e-puḳhta-kār kī

fareb-kāriyāñ na pūchh josh-e-intizār kī
tamām shab sunā kiye sadā ḳhirām-e-yār kī

mai-ḳhāne kī rasm-o-rāh meñ bhī ho jaa.e na shāmil khoT kaheñ
ḳhuddām fareb-āmāda haiñ ḳhidmāt kī niyyat Thiik nahīñ

na harf-e-naf.i na chāk-e-sabāt-e-darmāñ hai
har ik fareb ke andar chhupā rahe hai koī

chāñdnī sirf hai fareb-e-nazar
chāñd ke ghar meñ bhī añdherā hai

shab bhar dar-e-gumāñ rahe dastak kā muntazir
galiyoñ meñ ik fareb ko āvāz-e-pā rahe

fareb-kār rafīqoñ kī ab nahīñ hājat
ki apne siine se ġham ko lagā liyā maiñ ne

fareb-ḳhurda-e-ulfat se pūchhiye kyā hai
vo ek ahd-e-mohabbat ki ustuvār na ho

taġhāful sāzgār-e-shauq-e-ahl-e-dard kyā hogā
adā se do fareb aisā ki dil dīvāna ho jaa.e

tamām umr jise raushnī samajhte rahe
fareb-e-chashm-e-tamannā thā raushnī to na thī

vo ḳhud-fareb shaḳhs thā patthar-shanās thā
aayā na us ko koī bhī apne sivā pasand

alag alag bhī bahut dil-fareb niklegī
kaheñge log abhī terī dāstāñ kyā kyā

munāfiqat kā nayā hai ye dil-fareb andāz
mujhe milā mirā dushman bhī āshnā kī tarah

kyā kyā fareb-e-aql diye un kī bazm ne
mere junūñ ko mahram-e-asrār dekh kar

goyā vo jalva-gar haiñ nigāhoñ ke rū-ba-rū
is darja e.atibār-e-fareb-e-nazar hai aaj

kuchh aisā hai fareb-e-nargis-e-mastāna barsoñ se
ki sab bhūle hue haiñ kaaba o but-ḳhāna barsoñ se