Tags-Dhoka

umr bhar ishq kā fareb rahā
kab hameñ apnā intizār na thā

hai kis qadar halāk-e-fareb-e-vafā-e-gul
bulbul ke kārobār pe haiñ ḳhanda-hā-e-gul

umīd-o-yās meñ ye roz-o-shab kī kashmakash tauba
ba-har-lamha fareb-e-gardish-e-ayyām kyā kahiye

kamāl jugnuoñ kā thā ki raushnī meñ kho ga.e
fareb apne saa.e hī se Dar gayā to kyā huā

vo tishna-lab bhī fareb-e-nazar meñ aa.egā
use bhī DhūñD hī legā sarāb mausam kā

fareb-e-dost na khāte to aur kyā karte
yahī to rasm chalī aa rahī hai aadam se

pata chalā ki basārat-fareb haiñ jalve
maiñ is ḳhayāl meñ thā aql pāsbāñ hogī

fareb-e-e'tibār-e-sa.ī-e-paiham
mirā anjām ho kar rah gayā hai

fareb-e-ārzū khā.eñ to kyuuñ kar
taġhāful hai na begāna-vashī hai

ek lazzat thī ḳhud-farebī meñ
varna kis ne fareb khāyā thā

rah-o-rasm-e-ishq pe rakh nazar ho jahān-e-nau kā payāmbar
na to ahd-e-rafta ko yaad kar na fareb-e-charḳh-e-kuhan meñ aa

na furāt-o-dajla pe naaz kar na fareb-e-gañg-o-jaman meñ aa
ye jahān sab hai tirā vatan tū kidhar hai apne vatan meñ aa

na mujh ko bahkāo in ujāloñ kī mehr-afroz rañgtoñ se
fareb hai ye kisī kiran kā nahīñ nahīñ raushnī nahīñ hai

ā.īne de sakeñge na tujh ko kabhī fareb
terī jabīñ pe terā pata chhoḌ jā.ūñgā

kahāñ kī duniyā kahāñ kī sāñseñ ki sab fareb-e-havās niklā
jazā kī muddat samajh rahā thā sazā kī mohlat meñ aa basā huuñ

fareb-ḳhurda-e-paimān-e-yār honā thā
rahīn-e-kashmakash-e-intizār honā thā

to kyā baqā freb-zada harf hai faqīh
to kyā faqat nabūd meñ rakkhā gayā mujhe

mujh ko fareb mat de ai mausam-e-bahārāñ
aise ka.ī shagūfe maiñ bhī khilā chukā huuñ

yuuñ to diye fareb sahāroñ ne umr bhar
dil ko baḌā sukūñ thā sahāroñ kī god meñ

fareb-e-sāqi-e-mahfil na pūchhiye 'majrūh'
sharāb ek hai badle hue haiñ paimāne