Tags-Dhoka

vo apnī ek zaat meñ kul kā.enāt thā
duniyā ke har fareb se milvā diyā mujhe

apnī āñkhoñ kā kuchh qusūr nahīñ
husn hī dil-fareb is kā thā

tire va.adoñ pe kahāñ tak mirā dil fareb khaa.e
koī aisā kar bahāna mirī aas TuuT jaa.e

tum apne jiite gharoñ meñ apne gharoñ kī sāzish bhī karnā shāmil
ukhaḌte ḳhemoñ kī qīmatoñ meñ 'asad' fareb-e-tanāb likhnā

qasam fareb-e-nigāh-o-dil kī hameñ to us justujū ne khoyā
vahīñ thī dar-asl apnī manzil qadam uThe the jahāñ se pahle

fareb-e-gesū-e-pur-ḳham ho yā ho shām-e-hayāt
vo shams kyā ki kisī tīrgī se ghabrā.e

ai fareb-e-barūn-e-mausam-zard
sabz the saare paat andar se

zamāna merī hañsī ko ḳhushī samajhtā hai
maiñ muskurā ke jo ḳhud ko fareb detā huuñ

koī fareb-e-tamannā na jalva aur na ḳhayāl
dayār-e-ishq meñ tanhā thā aur tanhā huuñ

fareb-e-ārzū kī sahl-añgārī nahīñ jaatī
ham apne dil kī dhaḌkan ko tirī āvāz-e-pā samjhe

vo jism hai to us ko faqat jism hī samajh
pardā kisī fareb kā phir darmiyāñ na rakh

muntahā-e-zauq-e-sajda ye ki ik fareb
kufr tak le aa.ī takmīl-e-musalmānī mujhe

khul chukā haañ khul chukā dil par tirā rañgīñ fareb
de na dhokā ai tilism-e-hasti-e-fānī mujhe

har aarzū fareb hai har justujū sarāb
machle jo dil bahut use samjhā diyā karo

yā tarīq-e-dost-dārī par bharosa hī na kar
yā fareb-e-dostī ke sehr ko bātil samajh

ḳhudā ke naam pe kyā kyā fareb dete haiñ
zamāna-sāz ye rahbar bhī maiñ bhī duniyā bhī

hayāt tū bhī to dhoke se kam nahīñ lekin
fareb tere liye sab se khā rahā huuñ abhī

pyaar kī bhuuk jab satātī hai
dostoñ se fareb khātā huuñ

sāmne ho mai-kada aur mai se begāna rahe
ye fareb-e-hosh-mandī hosh-mandāna rahe

bachche fareb khā ke chatā.ī pe so ga.e
ik maañ ubāltī rahī pathar tamām raat