Tags-Dhoop

āsmāñ ek jast-e-tāza-damī
dhuup bhar par TaToltā huuñ maiñ

ham dhuup meñ tapte to panap jaate magar ab
daryūza-gar-e-mehr-e-lab-e-bām hamīñ haiñ

musalsal dhuup meñ chalnā charāġhoñ kī tarah jalnā
ye hañgāme to mujh ko vaqt se pahle thakā deñge

ashkoñ meñ ham gūñdh chuke the us ke lams kī ḳhushbū ko
mom ke phuul banāne baiThe lekin dhuup ne aan liyā

zaḳhmoñ kā do-shāla pahnā dhuup ko sar par taan liyā
kyā kyā ham ne khashT kamā.e kahāñ kahāñ nirvān liyā

vo sardiyoñ kī dhuup kī tarah ġhurūb ho gayā
lipaT rahī hai yaad jism se lihāf kī tarah

ye pariyoñ se chehre jin par jaan chhiḌakte haiñ ham log
mujh ko in peḌoñ ke nīche dhuup milī hai saaya na.iiñ

jannat kī ujlī chamkīlī dhuup meñ tap kar
maiñ har baar nikhar jaatā huuñ

aadhā jism sulagtā aadhā jal-thal hai
jaane kaisī dhuup hai kaisā bādal hai

āḳhirī dhuup haiñ āñkhoñ meñ basā lo varna
phir kahāñ ḳhvāb kisī shab kā suhānā hogā

jab tak sar pe dhuup khaḌī hai
saaya be-ārām chalegā

ik dhuup sī tanī huī bādal ke ār-pār
ik pyaas hai rukī huī jharne ke bāvajūd

na kar jabīn-e-ḳhiyām zaḳhmī na sah azāboñ kī dhuup sar pe
na kar havāoñ kī parvarish yuuñ ki zor-āvar tanāb TuuTe

halkā sā ik abr-e-ravāñ huuñ
dhuup meñ jaldī chhaT jaatā huuñ

kabhī saaya to kabhī dhuup kā manzar badle
dar-o-dīvār hue dasht-numā ghar badle

ab maiñ huuñ aur shiddat-e-ġham kī hai tez dhuup
un gesuoñ ke saa.e ghanere chale ga.e

vo tapish hai ki jal uThe saa.e
dhuup rakkhī thī sā.ebān meñ kyā

safar kī dhuup ne chehra ujaal rakkhā thā
vo mar gayā to sirhāne visāl rakkhā thā

baal to dhuup meñ safed kiye
zard kis chhāñv meñ libās kiyā

vo dhuup vo galiyāñ vahī uljhan nazar aa.e
is shahr se us shahr kā āñgan nazar aa.e