Tags-Dhoop

TuuT jā.egī dīvār jitnī bhī mazbūt ho
us ke ehsās kī dhuup bhī sā.ebānī nahīñ

kisī bachpan meñ banā.ī huī kashtī jaisā
saath terā thā magar dhuup kī narmī jaisā

kyā ḳhabar thī ki yahīñ vasl ke saa.e ke qarīb
dhuup ke beach paḌī hogī judā.ī us kī

dhuup paḌī, to khul ga.ī āñkheñ, khul gayā saarā bhed
ġhash khāyā, to dauḌe aa.e munshī, panDit, ved

tez dhuup meñ aa.ī aisī lahar sardī kī
mom kā har ik putlā bach gayā pighalne se

mom kī tarah pighal kar dekho
phir kaḌī dhuup kā manzar dekho

koī shajar na ḳharīdā ḳhulūs-e-jāñ ke evaz
shadīd dhuup meñ ThanDī havā nahīñ māñgī

ab saḳhtī-e-daurāñ kī kaḌī dhuup hai aur ham
lekin tire kūche kī havā yaad hai ab tak

jism par sard havāoñ kī fusūñ-kārī thī
dhuup ta.avīz na kartī to mirā kyā hotā

tire bune hue sweater kī dhuup yaad aa.ī
to aur bād-e-zamistāñ akaḌ akaḌ ke chalī

kabhī kabhī mire dāman ke kaam aa.egī
ye dhuup dīda-e-tar meñ rahe to achchhā hai

apnī ḳhvāhish meñ jo bas ga.e haiñ vo dīvār-o-dar chhoḌ deñ
dhuup āñkhoñ meñ chubhne lagī hai to kyā ham safar chhoḌ deñ

vo sunahrī dhuup ab chhat par nahīñ hai
ham bhī ā.īñe ko ab andhā kareñge

kyā ajab shaḳhs hai ki baiThā hai
dhuup meñ sā.ebān ke aage

maiñ us kī rahm kī bārish meñ qaht-zār huā
vo ab ke dhuup se miTTī mirī bhigo.egā

in ke chehre jagmagāte the ḳhizāñ kī dhuup se
dard kī bārish ho jaise ruup ke bahrūp se

maiñ ne rāhat kā Thikāna ab talak paayā nahīñ
dhuup kī bārish hai lekin duur tak saaya nahīñ

jalī haiñ dhuup meñ shakleñ jo māhtāb kī thiiñ
khiñchī haiñ kāñToñ pe jo pattiyāñ gulāb kī thiiñ

isti.āre DhūñDhtā rahtā huuñ maiñ
dhuup meñ uḌtī sunahrī dhuul ke

badan kī dhuup ne vo haal kar diyā hai ki maiñ
ridā-e-sāya-e-ashjār DhūñDne niklā