Tags-Dhoop

kabhī saaya hai kabhī dhuup muqaddar merā
hotā rahtā hai yuuñ hī qarz barābar merā

kuchh aur dhuup to ho os suukh jaane tak
vo peḌ ab ke baras bhī harā harā sā hai

dasht ke dhuup ne ham ko ye batāyā 'ḳhāvar'
apne ghar ke dar-o-dīvār kā saaya kyā hai

dar-o-dīvār par itnā paḌā hai saare din paanī
agar kal dhuup bhī niklegī to ghar baiTh jā.egā

idhar bhī aa.eñ kabhī dhuup ke satā.e hue
shajar khaḌe haiñ sar-e-rāh sar jhukā.e hue

dekhiye sochiye mahsūs to hone diije
dard kī dhuup meñ ehsās kī lazzat le kar

dard kī dhūp-bhare dil kī tamāzat le kar
kaise jaa.e koī ehsās kī hijrat le kar

tazād us kī mohabbat kā maiñ hī jāntā huuñ
jalāyā dhuup meñ āñchal kā aasrā bhī kiyā

ab dhuup ugaltī sochoñ meñ
kuchh paimāñ jalte rahte haiñ

sāhiloñ kī shafīq āñkhoñ meñ
dhuup kapḌe utaar kar chamke

ik dhuup sī hai jo zer-e-mizhgāñ
vo aañkh abhī uThī nahīñ hai

mujhe apne ruup kī dhuup do ki chamak sakeñ mire ḳhāl-o-ḳhad
mujhe apne rañg meñ rañg do mire saare rañg utaar do

sulagtī dhuup meñ jal kar faqīr-e-shab tirī ḳhaak
kyuuñ ḳhān-qāh-e-shab-e-be-karāñ maiñ baiTh ga.ī

dhuup meñ patjhaḌ kī un kā peḌ se rishta hai kyā
sūkhe DanThal jin ke haiñ un pattiyoñ se pūchhnā

meñ chalā thā raat ko bhī din banāne ke liye
sar pe mere dhuup ko phir sā.ebāñ honā hī thā

peḌ to saare hī be-barg hue jaate haiñ
dhuup to aa.egī saaya nahīñ aane vaalā

kuchh chamaktā sā nazar aane lagā hai ret meñ
baḌh rahī hai mere qadmoñ kī ravānī dhuup meñ

us kī furqat kī tapish meñ maiñ jhulas kar rah ga.ī
varna itnī taab kab thī āsmānī dhuup meñ

chāñd kī āġhosh meñ hone se jis kā hai vajūd
khil sakegī kyā bhalā vo rāt-rānī dhuup meñ

ḳhatm hai bādal kī jab se sā.ebānī dhuup meñ
aag hotī jā rahī hai zindagānī dhuup meñ